独家丨王君馨感激老公包容任性追梦 演「澄澄」勾起童年示爱失败回忆
2021-10-03 22:30 
王君馨常演阴沉、感情错综复杂嘅角色，直至喺新剧《我家无难事》终于反璞归真饰演开心简单嘅西洋刺绣师傅「澄澄」。现实中王君馨对跳舞、唱歌及演戏有要求，她感激老公包容她的任性，唔会要求她嫁鸡随鸡返纽约「交人」，反而鼓励她留港实现梦想。采访：方骞平 摄影：沈健程 化妆：Karrie 发型：Jamie Lee 服装：Diesel 饰物：Pandora 场地：Greyhound Café Galleria
王君馨好锺意「澄澄」一角，「佢好容易开心同满足，而且文青造型好有新鲜感，就算拍街景及返到公司都冇人认得系我，啲fans话我好cute。」
自细跳舞好多人追
演绎纯情「澄澄」令君馨勾起小时候纯纯的爱：「好记得小六阶段，特登学唱一首韩文情歌，只想喺表演中向心仪嘅男同学表白，点知对方完全接收唔到，反而有留意我跳舞，仲等我放学，因为咁我对佢再冇兴趣，我唔锺意啲男仔只系欣赏喺台上性感、有型嘅我，咁样太过表面。」君馨唔锺意肤浅嘅男人，而事实上因为跳舞，她由中学到大学都有好多追求者，「但拍拖就未必想要呢啲，我老公喺cafe同我相遇系一见锺情，之后不停为见我嚟饮咖啡。不过，我哋拍咗拖个半月后就维持咗12年异地恋，直至婚后佢由纽约搬嚟香港生活。」君馨大赞老公好迁就她，任由她去追梦：「就算达唔到梦想，但佢系永远陪伴住我嘅人，我好安心。」
關鍵字
最新回应