独家丨张伟文仲唱到唔想靠社福做废人 死过翻生增肥100磅再开骚

4年前，「靓声王」张伟文受腰椎毛病困扰体重急跌至100磅，瘦到惊现「筷子脚」。好彩患难见真情，得好友方俊悉心照顾，家阵长肉至200磅逐渐回复状态，今年尾及明年初仲会开3场个唱，他笑晒报喜：「冇得唱歌等于一个废人，只系靠社福撑住条命都几恐怖！」采访：方骞平 摄影：沈健程

64岁嘅张伟文（Donald）将会喺今年12月20日、明年1月12日及14日分别喺香港文化中心、沙田大会堂及元朗剧院举行《友情有义演唱会》。日前身兼Donald保母及个唱表演嘉宾嘅方俊(Aman)在家中宴客，更约埋环星娱乐老板张国林，「环星一哥」尹光齐齐陪Donald食饭为他打气。


肥返坐唔落电动轮椅

Donald近年行动不便靠轮椅代步，就算上落私家车，甚至如厕都带点困难，喺演唱会宣传期间，Aman请咗猛男助手，负责推出推入贴身照料。Donald当日现身街市买餸大受欢迎，菜档姐姐向他挥晒手打招呼，海鲜档阿姐请他食海鲜：「想食乜呀？唔使钱任攞！最紧要健康。」Aman取笑他是「街市杀手」，Donald露出满足神情说：「唔好咁讲，大家畀面啫！」而做咗成日嘢嘅Donald当晚有啲攰，连记性都差咗，啱啱去完厕所又话有啲急。不过，见Aman、张国林及尹光玩得咁high，都有加入战团jam返两句《相思泪》、《红烛泪》及《荷里活大酒店》，仲好好胃口劲食Aman为他煮嘅「笑虾虾」牛油果蟹肉沙津。咁好胃口难怪Donald心广体胖，𠵱家体重回升咗百几磅，条腰粗咗10寸，更有双下巴及大肚腩，仲因为超磅坐唔到电动轮椅！

有「肥仔声」最啱开Show

Aman指张伟文再开个唱系几大鼓舞，因为他于2016至2018年接受咗两次腰椎大手术，术后颈椎退化令双脚冇力，多次跌倒撞亲搞到脑积血，2019年要入院放血续命！Donald直认记性差咗：「跌过个脑真系唔得，所以𠵱家要小心啲慢慢谂嘢，唔好行差踏错踩落个氹度！」Aman话Donald唔攰时反应比较快，加上翻肥，多返啲口腔肌肉，呢啲『肥仔声』特别圆润，系开演唱会嘅最佳时机。Donald亦对演出有信心：「我唔觉自己有好大问题，平日都曲不离口娱乐自己。」Donald停咗两年冇开个唱坦言好唔开心：「最紧要有得唱歌，有得搵食仲觉得自己系有用，否则等于一个废人，𠵱家有啲其他收入会冇咁担心，而社福资助只够养我条命，𠵱家唔使成日好似鬼追人咁(求福利)。」在旁的Aman指社福资助唔够cover生活，其实他每月有补贴张伟文的老人院开支，只不过冇同佢讲。