独家丨梁奕蓝卖生酮食品赚到再发音乐梦　戥同届《造星》战友MIRROR开心

凭ViuTV选秀节目《全民造星》为人熟悉的梁奕蓝（Hayden），入行20年演艺路好崎岖，自17岁跟师傅周启生学创作，因被旧爱妈咪认定玩音乐冇「钱」途，最终分手收场；之后靠勤力密密写歌赚唔少，仲成家立室生埋仔，惜3年多前工作量剧减，结果为三餐走去揸Uber，「嗰时都谂过唔做演艺事业。」幸《造星》令其名气大增，点知再遇上疫情致大半年收入得4位数，一家之主惟有另觅出路，结果经营的生酮饮食生意愈捞愈掂，更有馀钱Support他的音乐梦！撰文：黎宝伦　摄影：谭壹致　场地：M48 WELLNESS LAB

37岁的梁奕蓝由幕后转做创作歌手，早年迎娶圈外女友Cici，二人育有6岁儿子浚铤，他说：「第一目标一定系照顾好个仔同太太，第二系自己嘅音乐梦。」回想2018年前，一直靠内地Job、写歌及做配乐等赚钱的Hayden，经历谷底8个月冇嘢捞，终于转揸Uber维持生计，其间载过不少艺人，「嗰时觉得有啲心酸，点解自己变咗呢个位置呢？系咪自己唔适合呢？睇吓个仔愈嚟愈大，既然唔适合就算啦，仲打算转行揸Van仔。」幸当时一出舞台剧搵上门，冇耐又参加了《造星》，令他打消退出念头。

感激《造星》带挈
深知做幕前个「壳」好紧要，Hayden近年勤健身及戒碳水化合物，操到自己好Fit。「疫」境下再遇低潮，半年仅得几千蚊收入，故去年决心开拓生酮饮食品牌，创业头半年已劲赚6位数，他感激《造星》带挈，「好多嘢都畅通好多，大家对我嘅信任度好高，演艺发展都好咗，多咗人搵我，亦都多人买我嘅产品。」可观的收入也让Hayden有足够支援去做音乐，目标做一首耳熟能详的代表作，问可羡慕MIRROR？他说：「唔会，因为过咗嗰个阶段喇，我好清楚自己唔一样，如果我24岁都会好努力争取入MIRROR，佢哋成功我都好戥佢哋开心。」