点呀丨为宣传广东新歌 傅颖边唱边自拍自己喊

自ViuTV剧《男排女将》后，邓丽欣（Stephy）曝光率好高，早排力图打排球活动，更带挈前Cookies队友杨爱瑾（Miki）上电视仲可以讲几句添。Stephy陈年宿敌傅颖（Theresa）旧年因为疫情返咗香港，当时佢仲话会将工作重心搬返嚟，唔见Theresa有咩演艺工作，不过有社交平台就唔怕冇机会曝光啦。

36岁嘅傅颖啱啱推出《写给无情人的情书》的粤语版《根本故事都跟我无关》，睇歌名都知系啲失恋惨歌，一向锺意拍片放上网嘅Theresa就玩一个小测试，试乜嘢?就系「一首一唱就想哭的歌」，然后佢就唱咗《根本故事都跟我无关》，重点系佢拎住播住歌嘅手机自拍，边唱边开始眼红红，最后眼有泪光地完结。为怕Fans担心佢，佢喺hashtag讲明，#不要留言安慰我 #我真的没有不开心😆，搞咁多嘢都系想宣传新歌，但呢个唱住自己歌然后喊嘅举动，真系唔系人人做到，同埋做得出。