【独家】强尼力推 《学神》抛胸飘移弹起 32D李贤出撃唔露点就得

李贤（Leanne）凭《学神出没注意》抛胸玩飘移，大抢「嘉倩BB」（陈嘉倩）风头被网民留意，28岁的Leanne本身其实做开幕后，疫情零工作下试玩幕前，仲得强尼亲自引荐拍《学神》。胞姐是演员李敏的Leanne，拍过网片𠵱家有机会拍埋电视都想继续发展，节目中靠性感出位的她，亦唔介意再行性感，只要三点不露就冇问题，仲话：「性感唔紧要，大家睇得开心就得啦！」讲到想合作男对手，Leanne首选伯乐强尼；强尼回应时被问到Leanne想行性感就笑住话：「佢IG都话畀咗大家听系嘅！」两人似乎真系几熟喎！撰文：杜淑霞 摄影：谭壹致 发型及化妆：Irene @makeupboobooboo 场地：场地：The AIR(The ONE)

对于《学神》时头集便性感出位，Leanne解释绝非刻意铺排，「咁啱我之前衬咗呢一套衫，post咗上IG大家都话好睇，PA（助理编导）打嚟话过两日拍飘移，咁就用呢套啦！拍摄去到中途，自己都觉得有少少唔对路嘅，见到大家唔系着到咁，如果有睇节目嘅朋友，都会见到我有啲寒背，因为突然觉得系咪劲得滞呢！？寒吓背先，等件拉鍊衫可以遮番落嚟，但后尾发觉冇用，唔紧要啦！大家睇得开心就得啦！引下大家入嚟支持个节目。」

抢唔到「嘉倩BB」风头



对于之后即刻有报导道指Leanne抢晒女神「嘉倩BB」风头，她就笑笑口话：「BB系抢唔到风头嘅，BB始终都系BB！」不过她承认节目出街后，确实多了很多人留意，亦加强了她入行决心，「之前都会有个疑问，系咪好适合呢行，我又未拍过节目、剧集同戏，得唔得呢！？《学神》出嚟嘅效果，我自己收番嚟都唔错，导演都好喜欢，即刻有另一个节目搵我拍，系个文化节目嚟，我负责去访问人。」对于继续行性感，Leanne绝对冇问题，但要睇场合，「我出街冇乜特别，锺意低胸咪低胸，但如果去探访长辈嗰啲就装重啲，喺呢行发展落去都会睇情况而性感，我唔抗拒性感呢样嘢，都系好正面气质嚟，只不过唔好令人觉得你系咪都露罗！所以《学神》我系头几集叫做性感咗少少，之后我有着樽领。将来如果拍剧、电影角色需要我都会唔会介意性感，但三点不露，我谂我妈咪应该心脏承受唔到。」



讲到合作男对手，Leanne首推引荐她拍《学神》强尼，「强尼同家姐（李敏）几年前拍咗Viu一个节目《对不起标签你》，《学神》导演同监制，强尼之前都有介绍过，今次拍《学神》佢就同监制讲『可以试吓搵Leanne喎』。合作就梗系强尼啦！其实我有好多artist我都好锺意嘅，但你话近啲都系同强尼大哥合作，无论系拍剧定做节目，我记得有次同佢讲我要同你拍剧，佢本身个才华真系好高，同埋佢好肯畀机会同教后辈，同佢做嘢会学到好多罗！（做情侣？）睇剧本，问吓佢O唔OK，惊佢唔想！」对于Leanne恨再合作，强尼回应话：「啱啱新入行做戏，有个熟人有安全感，呢个我可以理解，不过3月之后佢就不停想搵唔同嘅人合作㗎啦！」他又谓Leanne严格来讲新唔晒，「佢拍网络嘅嘢都一段时间，幕后都做过，佢家姐又做呢行，都算半只脚喺呢行入面。」对于Leanne想行性感，强尼笑言：「佢IG都话咗畀大家听系嘅。」