【调教你MIRROR】Edan耳边讲嘢令Ian打冷震 AL获黄修平赞演技细腻

最新一集《调教你MIRROR》，经理人花姐（黄慧君）希望梁祖尧（祖祖）帮手调教Anson Lo（卢瀚霆、AL），「其实MIRROR嘅成员都唔太了解佢，佢太顾及成员感受反而俾人误解。」祖祖表示有人指AL「好有礼貌，令人觉得佢唔太真心」，花姐大爆：「我同AL倾过，原来佢小学已经俾老师咁讲，叫佢唔好咁虚伪，要真心啲。」花姐指AL「宁愿有礼貌好过乱讲嘢」的做法竟然令人误会，两人觉得好笑之馀又费解，因为AL本性相当善良。

祖祖安排12子上演戏课程，更请到《狂舞派》导演黄修平及电台前DJ锺雪（锺雪莹）做嘉宾，令MIRROR好惊喜。AL表示他与黄修平早前拍广告合作过，但今次再见面依然好紧张。镜仔分成6组「情侣档」演出，姜涛及AL一组，AL演绎女主角，点知出咗门口之后开唔返门令众人爆笑；姜涛获祖祖大赞：「佢本能反应几好，唔使谂都可以直接演，好有创作力，但导演可能未必驾驭到佢。」

Jer（柳应廷）和Frankie（陈瑞辉）一组，途中Jer不断忘记对白，更要队友提水，而Frankie的反应令祖祖十分惊喜：「佢有个好好嘅条件，就系唔会质疑对手，完全信任对方。就算Jer唔记得台词，甚至离开场景走去问队友，Frankie依然留喺度等待对方。」Stanley（邱士缙）及Edan（吕爵安）一组，唔知后者系咪拍完港版《大叔的爱》仲未抽离角色，竟然哄埋Stanley耳边讲嘢。队友AK（江𤒹生）睇到劲投入眼甘甘，Tiger（邱傲然）就忍唔到笑，Ian（陈卓贤）直头打冷震！

此外，Alton（王智德）与Jeremy（李骏杰）、Tiger及AK、Lokman（杨乐文）和Ian合演。祖祖特别喜欢Tiger与Lokman的演出：「钟意Tiger好实在咁演，个底够实净，导演要加嘢都容易啲。Lokman平均值最高，无论专业度、创作能力、集中能力、节奏感、同对手交流嘅能力、真诚度，佢系最平均，而且系平均以上，我会好想同佢呢类演员合作。」最后由Lokman、姜涛及AL进入下一轮，跟锺雪做对手戏，黄修平指：「做得最细腻同Surprise到我嘅就系Anson，佢真系做到好Feminine（女性化）嘅感觉。」

AL事后笑言：「头先个演出，冇谂过大家觉得我心底系公主同八婆！」他在第二轮要演回男仔角色，依然自然流露，更没有甩嘴或忘词。AL曾担心自己记不到剧本，又要有起伏，相当有难度，「把握好呢次，每次都当最后一次，要100% Show到Anson Lo有啲咩。MIRROR由12人组成，卖点系12个唔相似嘅人，12块唔同嘅镜碎片放埋一齐变完整嘅镜，系我哋Selling point，但而家好似偏离咗。」

此外，花姐表示姜涛改变不少：「佢好少拒绝粉丝，而且一有兄弟喺身边就好少愿意主动企出嚟，通常都系叫队长Lokman或副队长AK做，今次系3年来第一次。」姜涛很庆幸大家一齐劝私追Fans：「呢件事对我、对12个人嚟讲系一个里程碑，未敢讲系好定坏，但大家系第一次去做呢件事。私追确实影响我哋工作，所以大家对呢件事有意见，一齐做呢件事好有意义。好多时候公司帮手挡，今次离开公司保护，可能呢件事处理得唔成熟、唔够好，但起码出发点系好。」

姜涛指Fans行为不当，亦间接影响MIRROR关系：「我真系想MIRROR好，一直唔太会为呢啲事而出声，知道自己粉丝可能比较多，喺呢个情况下，对兄弟有少少唔好意思。有时我啲粉丝令大家……可能彼此嘅粉丝影响大家关系，所以自己冇特别讲，但今次希望令大家知道，其实我好Care大家感受，都Care工作环境。」AL在「梅窝事件」当日突然发烧，要由队友傍住，他认为是一直压力太大，又面对私追问题所以身体受不住。