【独家】Dear Jane观塘海滨拍广告　Tim再做老窦风骚系咁笑

Dear Jane主音黄天翱（Tim）上周三（23日）再度荣升老窦，其妻杨洛婷（Rabeea）为他诞下「小王子」Tristan Hart。屋企再增添一位成员，作为一家之主的Tim亦要更努力搵奶粉钱，前日（30日）他便跟队友到观塘拍摄饮品广告，其间，人逢喜事精神爽的Tim未Roll机已频频露出灿烂笑容，仲爆老婆对住「迷你Tim」又堕入爱河喇。采访：张咏森、黎宝伦

当日下午4时许，Dear Jane穿上恤衫西裤现身观塘海滨公园，并一人揸住一支樽装茶，写意地倚靠栏杆拍摄饮茶Shot。细心听工作人员讲解后，他们很快便一Take过完成，见到《头条日报》记者在场，四子也Nice爆应要求停低影相兼受访。提到再做老窦， Tim即笑到合不拢嘴，问到咁快开工不用陪老婆？他笑道：「要㗎，但工作一定要做，奶粉钱点都要搵嘅。（多个小朋友吃力啲？）冇所谓，会尝试再勤力啲。」谈到终于凑够一个「好」字，「造人」方面可收工了吧？Tim说：「暂时先啦，等老婆休养吓。（开心追到仔？）开心，老婆仲开心，有时玩嗰阵个女黐我，咁佢都想有自己嘅『前世情人』。（呷醋？）唔会。」

至于如何奖励老婆？他透露计划待Rabeea坐完月，便去食饭庆祝。而队友们也打算送礼给Tristan，结他手Howie表示：「终于见到一家四口，好得意，佢系第一个达标，我哋都衷心祝福佢。」笑问未婚的3人可会追赶Tim的进度？众人齐声笑称「追唔过」，Howie续道：「如果我哋有机会生小朋友就有Tim教。」并谓已看过Tristan萌照，低音结他手Jackal即爆B仔似Tim，Tim得戚笑说：「咁就弊喇，老婆又堕入爱河喇。」