【独家】停Job半年 借十几万玩《造星III》 陈苇璇公开搲捞还债

热爆的《全民造星III》上周六总决赛顺利结束，一直被睇高一线冠军在望的陈苇璇，最终只得亚军，不过自言唔算有观众缘的她，觉得观众票选排行第三名，已经好满意成绩。其实苇璇15年参加选拔赛加入女团As One出道，到17年单飞，人气远远唔够参加《造星III》，ig的follower更由6万4千激增至近10万。不过苇璇赚到人气，荷包反而乾塘，节目冇演出费外，她自爆忙比赛半年搞到零收入，仲要自资请dancer、订造服装同搵造型师等等，瓣瓣都系钱，好彩经理人公司垫支6位数，攞完奬仍要还负债的苇璇，唯有公开搲捞，已有几个工作接洽中的她，更定下目标，「希望一个月还得晒啦！」撰文：杜淑霞 摄影：谭壹致 发型：Larry Ho @ Aveda IL COLPO 化妆：Melody Chiu 服装：ba&sh 场地：Studiodanz

对于今次赛果，苇璇相当满意，因自评观众缘不及其他参赛者，「今次因为有民选，民选我系第3嘛！我已经好满意。我系冇信心（民选），因为我见Cloud（云浩影）、Ben（赵祥诚）、ANSONBEAN（陈毅燊）佢哋全部都系大家好喜爱嘅性格，都系比较亲和力，可能我一向形象比较cool。」其实苇璇的观众缘，靠《造星III》入屋程度已帮她储埋唔少，ig的follower暴升3万5千个，仲收到不少人DM她赞她唱跳好睇，当然最直接是畀fans认得，「好surprise，啱啱同经理人食饭，餐厅有个妈妈级嘅食客叫我『苇璇』，真系好幸福，原来𠵱家电视仲有咁多人锺意睇！」




苇璇比赛期间一直表演出色，但亦有部份负评出现，首先网友认为25岁的她表现老积，特别在总决赛演唱林忆莲的《愿》，更惨评似演出《流行经典50年》，身经百战的她却答得轻松，「我个样系生成咁嘛！其实我细细个已经系咁嘅样啦！哈哈！18岁已经畀人话似25岁。而我觉得好有幸唱到《愿》咁经典嘅歌，同埋系搵咗Travis（参赛者）重新编曲。点解要拣首咁难嘅歌嚟唱，田为首歌意义等同于《全民造星III》『最尾一幕，还未闭幕，最濶的路在尘世远方』就算呢个节目完咗，我哋仲有好远嘅路要行。」不过她笑言有在打扮上下功夫减龄，譬如这天专登留了额前的荫。

不介意被评腿粗


至于苇璇因经常穿bodysuit表演而被网友狠批长期冇裤着，亦被指双脚线条未够吸引，她亦完全不介意，「我自己好锺意欧美装，好期待可以有一日可以有个红馆咁大嘅舞台可以承托到咁爆嘅装，睇外国嘅歌手Lady　Gaga、Beyoncé、Jennifer
Lopez，甚至系蔡依林同（容）祖儿喺演唱会，10套有5套都系呢啲cut，我自己想试罗！今次有咁大嘅舞台，就做自己最锺意做嘅嘢，𠵱家唔试唔知几时可以做呢样嘢！至于我条腿不嬲都系运动员腿嚟，如果大家有睇我以前啲片条腿仲粗，我对𠵱家条腿都几满意。我唔强求观众全部外形都锺意，但系我觉得嗰套衫系好靓嘅。」



不过原来这些演唱会级表演效果，比赛期间零收入的苇璇，自爆要向公司借钱6位数才能完成梦想，「尽量悭啲使罗！你睇吓我都自己煮嘢食，呢个比赛开头唔系用好多（钱），系20强唱《Born This Way 》同埋决赛嗰晚《Get Right》要请Dancer，主要都系人手上，styling都有用咗啲钱，战衣都要几千蚊！Alina（李静莲）话嗰件都要几千（差不多一万）哗！佢真系有钱！（佢话用晒身家）问Stanley攞，哈哈！」由于靠公司垫支，她坦承要努力接工作，「我嘅心愿，终有一日会如愿，就系搵多啲job。已经有几个报紧价，广告之类，大家可以再帮多啲，真系要靠你哋，我搞唔掂呀！我希望一个月还得晒！」不过问到如果这10多万，当交学费又抵唔抵呢？苇璇好肯定话：「抵！同埋缘份呢样嘢，系用钱买唔到！」