【独家】《造星III》决赛夜 祖祖一讲Ben就喊 Alina KLAU落败另一半揽住呵返

《全民造星III》前晚（26日）举行总决赛，最终由以跳「折骨舞」出神入化的Ben（赵祥诚）成功夺冠，陈苇璇得亚军，季军就是深得评判毛舜筠喜爱的ANSONBEAN（陈毅燊）。完骚后，邀Manson（张进翘）做嘉宾演出的Alina，有MIRROR成员男友Stanley（邱士缙）现身揽揽畀爱的鼓励，他更向《头条》自爆如何支持女友。而曾表示想同KiKi继续发展的KLAU，获女方劲赞表演有500分，搞到男方即变怕丑仔。至于俾A组参赛者昵称为「妈妈」的客席导师梁祖尧（祖祖），讲「阿仔」Ben夺冠，更感触到秒速眼湿，仲自爆制作组有意邀他任《造星4》导师。采访：杜淑霞、廖思慧

总成绩得到第7名的Alina，对于两个item演出，她坦承第一个表演较失准，「第一个item第一粒音就走咗，系畀自己一个好大挑战，上唱歌堂唱到崩溃，唱到喊，呢只歌好难，但系首歌好正一定要做到，今日算合格啦！」此时Stanley现身，《头条》拉拢下终肯畀女友一个爱的抱抱，更大赞女方表现，「我觉得好好喎！好似好行，但系认真嘅，第一只歌编排上面冇问题，因为有个好好嘅排舞师，跳舞上好夸张嗰啲系佢得分位，当然我最惊佢唱歌，佢唱都系有问题嘅，但系睇得出佢已经好努力，喺电视机同现场听差好远，我啱啱喺厂听，都觉得OK！100分嚟讲（Alina：有冇50？）70分啦！（Alina：多谢你呀！）我即刻send message畀佢话好好。」

至于点样支持女友，Stanley就自爆：「我其实呢几日都系出任助手嘅角色嘅。」他在演出方面亦一直有畀女友意见，「譬如佢同Manson嗰只舞，我都有份参与少少排舞，都一路有follow up成件事。其实赢输唔紧要，嚟到呢度咁多人睇呢个节目，已经系赢咗，多咁多人认识Alina李静莲系边个。」讲到Alina向《头条》预告有表演嘉宾时，以为是Stanley，他即搞笑话：「我惊我抢佢光芒！（Alina：唔得！我哋一定会闹交㗎！）我𠵱家始终系巨星嚟！」

祖祖爆花姐斟做导师


总成绩得到第6名的KLAU，就自言好满意成绩，「大家接收到我嘅energy，同埋金生（ViuTV高层金广诚）都话见到我两届有唔同嘅表现，我觉得自己已经赢晒所有嘢。」而女友KiKi更加对KLAU演出赞不绝口，「身为之前嘅队友，我哋又咁好朋友，我系好满意！因为佢真系好努力，摆咗好多心机、时间、创作、排练，我好戥佢开心，我觉得佢表现超班。几多分？畀佢500分！」KLAU边讲多谢边怕丑到拧转面，好鬼甜！跟住仲自爆，除了导师彭秀慧指导外，这次演出女友都有出力相助，「佢畀咗好多idea我，主要喺演技方面，应该点样做，帮我补咗好多课。」

做客席导师以来好肉紧的祖祖，提到「阿仔」Ben夺冠，他认为Ben是参赛者中进步最多，亦令他最为惊喜的一个，他边讲边难掩兴奋心情，秒速眼湿，「同你哋讲啲真心话，我好满意，因为阿Ben从来都系我心里面嗰忽肉嚟，我又想喊！因为《想念》嗰part，你哋系唔会知道，我哋系用咗几多个通宵教阿Ben行路，因为佢跳开舞，唔可以好感性同中性咁样行，𠵱家行到呢一步，呢个仔攞埋冠军，我觉得好骄傲，我作为佢朋友好骄傲，其实我哋都系屋企人嚟。我心里面好想佢系冠军，我知道佢唔系主流嘅人锺意嘅嘢，但系喺观众投票，佢得到呢个赛果，我觉得香港观众已经进化，新世代来临啦！所以我系好感动。」他又谓前一晚总彩排已觉不舍，「我𠵱家喺呢个位就最好，我又唔系导师，我系客席，我系『妈妈』啫，我系负责锡大家，爱大家啫！花姐有问我，下年想唔想做导师？当然想啦！但系如果要我同二汶做对手，我就唔想啦！我唔离婚呀！我唔要我哋个家散呀！哈哈！我想保住我头家，唔知一齐得唔得？！彭秀慧都系好朋友，对佢我都唔想，我唔系咁锺意比赛嘅节奏，但又好想好好培育佢哋。」