【独家】唔怕中招 老临推撞群戏主动「加码」 马德钟笑言冇唞气唔使惊

本港新冠肺炎累计8千多宗确诊个案，141人死亡(截至29/12)，去到第四波疫情非常严峻，近月多日过百宗确诊，最近至回落双位数，但有大量源头不明个案，人人自危。不过，视帝「马神」马德钟为工作豁出去，喺疫情下，他跟唐诗咏喺一间酒店宴会厅为TVB新剧《我家无难事》拍一场大堆头戏，剧情讲两人畀20几个「记者」边叫喊边围住，拍剧当然冇戴罩，「马神」为求效果更逼真，提出加入肢体推撞动作，手口并用去救妻，同老临密切接触，非常勇敢！采访：方骞平 摄影：张咏森

王心慰监制的新剧《我家无难事》主角马德钟及唐诗咏都系TVB大红人，期间分别孭剧如《飞虎之壮志英雄》及《白色强人II》喺身，档期相当紧张，就算疫情肆虐，拍摄都唔可以甩期，台前幕后惟有加强防疫，工作人员除咗戴口罩，食饭更要保持距离，连唐诗咏恰眼瞓都会远离人群，坐埋一边。

「马神」飞虎上身护诗咏

当日场口讲马德钟及唐诗咏被屈，喺记者会中被爆黑材料，因而被大批扮演记者嘅临时演员包围追访，同场仲有好多「Fans」及「嘉宾」。而「马神」为咗救妻，扑上前拖住老婆唐诗咏冲出重围。排戏时「马神」向导演提出唔少意见，尤其画面上，觉得冇可能斋talk，要出手推开及撞开阻头阻势嘅记者，奋力咁去保护老婆离场先够合情合理，他仲搞笑话：「谂唔到呢套小品喜剧，都拍到好似《飞虎》咁！」随即惹来全场大笑。而一Roll机，「马神」即嚟料，好勇猛咁推开及起脚踢开几个「记者」，直至去到诗咏身边时，两人一度被「记者」的口水淹没，最后「马神」用西装褛包住诗咏个头，再护住身穿5寸高踭鞋嘅诗咏拔足狂奔，火速逃离现场。

诗咏半年嚟只见几个朋友

事后问到「马神」及诗咏跟一大班临时演员近距离拍摄惊唔惊？前者语带轻松搞Gag说：「我冇呼吸，所以唔怕！」相反诗咏就紧张好多，即答：「惊㗎！好彩有件褛挡住(飞沬)！」马德钟补充：「其实开工冇法子，真系避唔到咁多，拍《壮志英雄》多动作场面仲惊呀，大家惟有喺日常生活自律啲，唔使开工，平时少啲出街。」诗咏认为最重要系个人卫生问题：「呢半年嚟，我约嚟约去都系嗰几个朋友，平均个几月先见一次面，就连跑步都唔约伴，尽量一个人跑。」