【幸有爱犬陪伴】丈夫逝世后憔悴现身　肥妈哽咽： 真系嚟得太突然

「肥妈」Maria Cordero于周四（5日）凌晨在社交网公布第二任老公Rick病逝的消息，事后她向传媒透露，3年前患上末期肺腺癌的Rick因肺炎离世。沉寂3日后，刚才肥妈终于「蒲头」更新Facebook，她上载了一条影片并写道：「知道我老公的离开，大家都好担心我，所以都想拍条片等大家放心。谢谢大家关心，好感恩有你地（哋）每一位的支持，依（呢）几日家人同朋友都陪住我，心情当然未能一时三刻平复，但有大家的支持，我会加油的。我老公最后的心愿都想我继续开Live，所以等我处理好老公的身后事，一定会再开Live 同大家见面。」

片中，被3只爱犬包围兼送抱的肥妈，穿上黑衫、黑裤及戴黑超，不单止声线较平时柔弱，身形也明显消瘦不少，她说：「我都知大家好关心我，唔使担心我，日日屋企人都嚟陪我、朋友都嚟……」说话未讲完，肥妈已忍唔住声震震想喊，沉默数秒后，她指着爱犬续道：「佢哋真系识性，睇吓几乖？日日我坐边度，佢哋就嚟晒边度陪我，所以唔好担心。我老公系半日之内自己话入医院，最后同孙女讲埋电话，然后就瞓觉，佢好安祥（离去），系我估唔到，真系嚟得太突然。佢临走叫我多啲同朋友、屋企人一齐，因为呢排佢病，我就净系照顾佢，呢几年都少出街，佢叫我记得做节目、Facebook嗰啲，因为佢知我锺意煮嘢食，我做嘅时候会好开心，佢话佢会睇，所以我烧埋Ipad畀佢。」

当讲到不觉得Rick已离世时，肥妈再次哽咽说：「太突然了。我好多谢个个关心，伤心一定有，呢排帮佢办埋啲后事先，唔系好想见人，办埋啲后事先睇吓点啦。」她又指老公4号入院，延至5号凌晨与世长辞，当办妥事情后，肥妈回到家已近凌晨4点，甫进门口便见到爱犬也在哭，她说：「所以你哋真系要对啲狗好啲，好有性……唔好担心，你睇我几多狗陪。」并感激家人及朋友百忙之中抽空来陪伴她，又希望疫情尽快消退，可以跟大家聚一聚。