【独家】一家穿黑衫商场上上落落罗霖两个仔傍住阿妈揿钱

2020-11-26 18:49

自13年跟刘坤铭离婚后，55岁的罗霖即全面复出幕前养家，供三个细路读书要用好多钱，不过，话咁快喺美国修读心理学的22歳二仔刘子熙（Jordan）已毕业，本月初仲跟日德混血女朋友闪婚，做咗奶奶嘅罗霖终可以松一口气。之前见到罗霖同23岁大仔刘子榕（Nathan）及14岁孻仔刘子晋（Jonathan)去又一城柜员机揿钱，三人全黑装扮，两个仔从后傍实妈妈，再望真啲，戴咗黑超嘅细仔高过阿妈，瘦咗，头发又长咗，好有星味。采访:谭壹致

当年罗霖离婚后讲过，靠自己养家，冇收过一蚊赡养费，「三个仔学费、生活费各样支出都好大，尤其系去国外留学，每年加埋食宿三十几万，去美国更加贵，每年接近五十万。」但之后刘坤铭就发声明指一直有支付三个仔嘅学费，并非如罗霖所指由佢单方面承担大部分费用。

细仔真系几有型
真相系点唔知啦，只知罗霖真系好勤力搵钱，就算因为疫情，返内地开两日工来回要隔离28日都照做，呢位阿妈话：「最紧要有工开，唔可以无了期咁等通关，其实之前已经推咗几个内地工作，主要系离开屋企太长时间，会挂住两个仔。」之前就见到罗霖同大仔及细仔现身又一城，三人全身黑，一个跟一个咁行，上上落落咁，两个仔仲傍住阿妈揿钱，然后行去等七人车离开，等车期间，靓妈不断帮细仔整理好件衫，无论仔女几多岁都系父母心目中嘅小朋友。