【独家】被指醉驾 懒理官司拍外景好笑容 杨明无意戒酒：又唔系毒品

惹上官非嘅杨明近日忙拍TVB新剧《我家无难事》，日前就跟王君馨喺深水埗手艺市集拍足全日外景，拍完大半日文戏，再接住拍场飞扑兼碌楼梯戏，杨明瞓晒身力保男一位置，拍摄其间全程笑容满面心情大好，惟独问到月前被指醉驾炒车，会否见到酒就惊？他答得避忌：「点解呢？酒又唔系毒品。」采访：方骞平 摄影：张咏森

当日先拍一场饰演设计师的杨明，落市集探访王君馨场口，因为现场人多摊档多，足足拍咗成个下午，不过，杨明心情大靓，除咗同冇戴口罩嘅女fans合照外，仲耐心跟小演员对稿，不时又撩吓台前幕后吹水，睇吓手机，全程笑到见牙唔见眼。入黑后就同王君馨有场嗌交戏，他要飞扑碌落楼梯，就算有替身，杨明点都要亲力亲为碌两嘢，执返个大特写镜头尾彩，飞扑碌落楼梯动作拍足十几次都冇怨言，反而愈拍愈High。

炒车撞历史石墙感内疚

接受《头条日报》记者访问时，王君馨表示老公返咗纽约同家人过感恩节，冇鼻鼾声下瞓得好舒服。杨明即带点兴奋地说：「佢真系好精神，而我直情有精神病，日日开两组，外景完到厂景，呢期戒瞓觉。」提到杨明喺8月8日凌晨，在山顶发生炒车意外，事后他解释因为忙同夜瞓，搞到揸车分咗神所致，问会否担心再生意外？他即说：「唔会挂？都OK嘅，有时得返两三个钟头瞓觉，我会喺公司瞓，带备牙膏牙刷，好似宿营咁。」至于被控门窗玻璃透光度不足、拒绝提供血液样本以作化验以及不小心驾驶共3项控罪，杨明承认官司一日未解决个心都会哽住哽住，但一做嘢就会忘记，始终要入戏：「收到路政署回覆，有关矮栏、石墙、告示牌等维修费大概5000蚊，交通意外中撞毁咗80年历史老墙当然有内疚，但自己真系唔想嘅，希望损毁程度可以弥补到，唔好有太大嘅破坏。」


醉驾系某啲媒体谂出嚟

问杨明今后会否见到酒就惊，要同酒划清界线时？杨明反应好快，反问记者「点解呢？」记者说：「因为涉醉驾炒车。」他带点尴尬，煞有介事道：「梗系唔会啦，酒又唔系毒品，而且件事进入咗法律程序唔方便讲，件事(醉驾)都系某啲媒体联想出嚟，佢哋联想唔代表系事实，如果要问不如问我，因为今次系交通意外，会唔会同车划清界线啦？但我会答唔会，因为揸车一唔小心就会有意外㗎啦，咁以后咪同好多嘢要划清界线？」至于今次炒车意外对他有乜启发？他说：「未有，暂时都系拍剧同睇剧本，等我静落嚟时再谂吓。」