【独家】疫情下唔使头痕搵工实习 涂毓麟叠埋心水专心做歌手

「公子」涂毓麟（Oscar）出道一年出咗4首单曲，除咗处男作《二人一世界》外，再有《Never Mind》、《日出彩虹》及《视像见》。读紧科大环球商业系YEAR 3嘅Oscar，喺疫情下做歌手反而觉得系入咗避风塘：「𠵱家我认定要唱歌，全神贯注唱歌写歌先，唔使好似同学咁，搵紧求职机会，好旁徨。」采访：方骞平

月前涂毓麟出完新歌《日出彩虹》，好快紧接再出《视像见》，歌词系紧贴疫情下，大家面对嘅问题：「呢首歌对我嚟讲好特别，系我跟大学同科朋友一齐创作，亦系公司选用我嘅第一首歌曲，因为系自己作曲，录音过程好顺利，只系用咗6个钟头就起货喇。」

提到出歌期间，MIRROR成员卢瀚霆（Anson Lo）、江𤒹生（Anson Kong）、柳应廷（Jer）及姜涛齐出新歌，Oscar唔觉被夹击，「大家有唔同风格，冇问题嘅，呢个市场需要唔同元素，每人锺意嘅嘢都唔同，所以唔构成『揽炒』，好似我首歌《视像见》咁好贴地，讲紧𠵱家发生紧嘅事，同佢哋嘅爱情歌唔同，而且一年得嗰365日，香港有咁多个男歌手，唔通个个都避开晒咩？就算同公司都会有相撞啦，我觉得愈多人出歌愈好，可能中间有啲时间冇人出歌，我反而觉得好空虚。」目前Oscar叠埋心水做创作歌手：「好多同学都搵紧工，但疫情关系，实习、搵工机会少咗好多，过去我都做过几份实习工作，𠵱家竞争真系大咗，好彩我认定咗唱歌，读书以外会集中火力去做，唔想半桶水。」