【独家】有谐星格 拎「煎Pan」当球拍咁玩　林德信拖「翻版莎莉」除罩食雪糕行超市　

自2012年出道以来，林德信（Alex）令人最有印象系「林子祥（阿Lam）个仔」、跟日模松冈李那的一段绯闻，仲有玩瑜伽玩到出神入化。原来大只型仔背后，Alex唔只扮鬼扮马好玩得，私下仲有一颗少女心！早前《头条日报》记者于铜锣湾撞到Alex同圈外女友Candace Poon行超市，前者买咗士多啤梨软雪糕，一攞上手即刻拎手机打卡，反观跟「未来奶奶」叶蒨文（Sally，莎莉）撞样的Candace就一拎即食。最重要系Alex拎住啲「煎Pan」当网球拍揈嚟揈去，呢期扮开Uncle Roger嘅Alex可以转型做谐星喎！采访：梁志明

一直予人型格又靓仔的林德信，平日勤力健身、玩瑜伽和Wakesurf，所以练得一身结实肌肉，今年7月于IG贴出的「激凸泳裤照」，更引来大批女网友「心心眼」！不过私下的Alex却超大反差，事关他完全系零「靓仔包袱」，好似上月底趁万圣节，Alex就以一身橙色Polo shirt摄西裤，再梳个扁塌宅男头，神模仿马来西亚籍「蛋炒饭网红」Uncle Roger，唔只造型学到十足十，连口音都一样，超爆笑！

Cute样冧死女
Alex唔只幽默，原来仲好有少女心。当日晚上7时许，Alex与拍拖3年的圈外女友Candace到时代广场的超市买嘢，两人先于日式甜品店买雪糕，Candace接过杯装雪糕后，即爽快地企埋一边除罩食，反观Alex一拎支粒粒士多啤梨雪糕，便秒速化身港女举起电话「相机食先」。多角度拍摄完毕后，先慢慢将口罩拉到下巴位置慢慢品尝，仲边食边望住支Cone眯眯嘴笑，咁靓仔仲要咁Cute，点算呀?

防疫意识低
之后两人无畏无惧，全程冇戴罩下边食雪糕边逛超市，咁样唔系几好喎。Candace走去买日本汤料包，最终拣咗108蚊一包的「幸福海鲜汤底」及一樽54蚊的无添加烧烤酱；而疫情下多咗下厨的Alex就去研究砂煲罂罉，其间他似乎睇中一个绿色细Size平底镬，反手睇完个说明后，他又无无聊聊拎住个镬周围走，沿途仲当个「煎Pan」系网球拍咁揈嚟揈去！不过行足45分钟，好得Alex欢心嘅「煎Pan」最后继续留喺超市。