【独家】咀女神张可颐好满足 邵仲衡公开冧妻三大守则

邵仲衡（大佬孝）最近在ViuTV新剧《暖男爸爸》饰演张可颐（Maggie）前夫「Roger」，他形容角色既是狂人，亦是个浪漫男人。谈到首度跟Maggie合作，他兴奋跟「女神」拍咀嘴戏，大呼好满足。讲到现实与圈外太太Wendy结婚19年，两个囝囝已分别18及16岁，能够维系好家庭关系，大佬孝自有一套冧妻三大守则。采访：杜淑霞 摄影：李维隆 场地：富卫1881公馆

首度跟Maggie合作，作为前辈的大佬孝竟化身小粉丝，「以前喺国内睇香港演员宁舍有亲切感，梗系有某程度上仰慕，作为小fans观众嘅心态，但系做呢行就有呢样好，下个戏就做一pair，日日对住。好多人好羡慕我同Maggie合作，尤其系我呢个年纪嘅朋友。」剧中大佬孝跟Maggie演过气夫妻仲有亲密戏，令他格外兴奋，「真系劲咀嗰场冇咗，但系后尾都有啲地方短兵相接，但系我都好满足㗎啦！哈哈！」

大佬孝01年跟从事地产行业的Wendy结婚，对于令关系保鲜，他认为有三大守则，「第一，唔好成日侵入对方领土；第二，就系搵啲生活小趣味，第三，唔好吓吓问到底要识得留白。」他坦言这是经验之谈，「老人家教两公婆嘅嘢，只眼开只眼闭，一定要畀对方空间，有啲嘢唔想讲唔好问，你有啲嘢唔想讲都唔锺意人问啦！另外，话长话短说直接啲，但有啲位反而唔可以咁直接，或者用其他方式，因为佢唔系街外人，或者工作上嘅朋友，佢系你太太，你要嘥多少少时间谂吓究竟用咩方式表达你嗰个『No』字。」至于生活小趣味，大佬孝以往爱带老婆去特别地方旅行，但因疫情他转为煮爱心餐，「自己都肚饿㗎！哈哈！（煮西餐定中餐多？）乜都有嘅，我自己锺意啲唔使太多功夫嘅，之前锺意煲汤嗰啲，但𠵱家会倾向整日本同韩国菜，因为调味料比较特别，几得意。」至于对待两个在英国读书的囝囝，大佬孝否认是「暖男爸爸」，但会比较开明不会太紧张成绩，平日仲会跟囝囝倾英超和讲音乐，「我觉得父母安排佢去间几好嘅学校已经够，我喺侧边提点吓，你考得好唔好唔关我事，你自己冇面啫嘛！」