【独家】另觅闺密　同冯盈盈各行各路　江嘉敏转黐高海宁做妹仔

自从「富豪船P」罗生门事件后，江嘉敏和冯盈盈便由「打卡之友」降呢「过气闺密」，两人更开始各自另觅「饭脚」，如本周日盈盈就约麦明诗擦蟹，而江嘉敏早于8月中已转黐「楷女郎」郭嘉文及富家女邝洁楹。除了埋有钱人堆，近日她又跟一线姐仔高海宁（高Ling）忽然老友，早前《头条日报》记者就见到两人去又一城食Tea，边食边交换化妆心得又孖住去买化妆品，不过呢段关系明显有「阶级」之分，平日大大声好多嘢讲的江嘉敏，面对高Ling即变得「鹌鹑」，全程企喺不出2米范围内Standby陪逛、畀意见，唔知以为系助手！采访：谭壹致

虽然合作过无綫剧《杀手》及《七公主》，但完全唔觉江嘉敏和高海宁私下有交流，就算喺IG搵张二人合照都难，估唔到近日两人却发展出「长短脚友谊」，日前仲一齐去又一城撑枱脚。

走样嘉敏
当日下午3时许，虽然只系落街食个下午茶，但贪靓的高Ling都戴晒帽、衬晒一Set韩风西装Look，星味浓到途人都忍唔住𥄫两吓！反观身高165cm的江嘉敏，着住件橙红色连身短裤衬白波鞋，同隔离屋妹仔冇太大分别；可能自知比较矮，为帮自己驳高啲，江嘉敏都刻意扎番个「道姑头」，同172cm的高Ling拉近啲啲距离。其间，两人在餐厅内哄到劲埋研究眼妆，记者Zoom近啲睇，发现素颜的江嘉敏眉短短、面肿肿，同镜头前甜美可人完全两个样，「易容术」咁高超，难怪高Ling都要请教她！

全程死跟
食饱后，两人戴番口罩便到楼下LOG-ON买嘢，高Ling主力睇日牌面膜、眼线笔、染发剂等，江嘉敏就一路长伴左右陪Shopping，最终高Ling拎咗几包浴盐去埋单。在排队畀钱时，江嘉敏睇中一个粉红色的迷你座枱电风扇，正当她兴高采烈打算Show畀高Ling睇时，一向行成熟性感路线的高Ling却唔多识欣赏，口噏噏直指唔靓，被泼冷水的江嘉敏即由「腰果眼」变「阿愁」，转身将风扇摆番原位。随后两人转往化妆品牌专门店，高Ling将唇膏、粉底逐样拎上手研究，不过玩完一轮冇帮衬，最后全程好好「服侍」的江嘉敏陪对方等Lift，之后再独自会合男友坐车离开。