【独家】若单身乜都去体验 沈卓盈搵出租男友𠱁开心

沈卓盈（Jess）离开娘家TVB后，最近首度参与ViuTV剧集，在《熟女强人》中饰演证券行财经分析师「冯大师」，她笑言食正花名「沈大师」好有趣，但要搵老公恶补财经知识。剧中单身的她既有下属洪卓立冧，又同part-timeboyfriend（PTBF出租男友）骆振伟有感情，她坦言若仍是单身，都会试试搵PTBF𠱁吓自己开心。讲到老公，Jess大赞对方百分百支持她工作，所以顺其自然不急于生BB。撰文：杜淑霞 摄影：谭壹致 发型：Green Cheung @AdmiX Hair Styling 化妆：Phoebe Yung @phoebeyung

沈卓盈在剧中周旋于洪卓立演的下属「梓谦」，与骆振伟演的PTBF「Jamie」之间，现实中已是人妻的Jess坦言，若然仍是单身都会尝试PTBF，「我会尝试吓㗎！呢个世界好open嘅，𠵱家日本同韩国都兴呢样嘢，同埋唔系大家想像中咁，只系行吓街食吓嘢，系陪伴嘅形式，系single乜都去体验吓。」Jess话若然单身会拣个多才多艺的PTBF𠱁自己开心，「譬如表演魔术、或者打吓侧手翻，我觉得几好笑，或者佢影相好靓，影相靓好加分，又要幽默，无时无刻都可以讲吓啲烂gag𠱁到我笑，咁畀钱先畀得抵，我系消费者嚟嘛！」

谈到剧中最难忘戏份，Jess不得不提跟一班姊妹齐齐睇猛男脱衣舞，「真系好疯狂，喺个礼物箱度跳出嚟，跟住跳啲舞又好sexy，我系未睇过嘅，第一次现场感受，大家嗌到黐咗线，兴奋过港男，仲要不停重拍，唔系跳一次喎！真系拍得好开心，大家叫到失控，呢啲真系好好嘅福利，唔使畀钱睇。」讲其他囝囝好开心，但Jess不忘赞老公好体贴，除了教她财经知识帮助演绎「大师」角色，仲好支持她发展演艺事业，「佢百分之一百支持，因为佢知道我锺意做嘢，如果我喺屋企Stay多两日就会嗌闷。」所以两人有共识生BB顺其自然，「其实系有planning嘅，生BB呢样嘢我由始至终都系觉得随缘啦！都系人生部份，一定会实行，但会选择随缘啦！」