【独家】醉酒闹事浪子变慈父 疫情下仔女主动黐身 郑中基独门方法引囡囡做功课

郑中基（Ronald）最近首度孭飞ViuTV下周推出新剧《暖男爸爸》，剧中他饰演患有严重抑郁症的单亲爸爸「阿荣」，跟囝囝「暴龙哥」打理便利店相依为命。要演爸爸难唔到有一对分别5岁和9岁仔女的Ronald，他有独门方法教细路，谂计引囡囡每日乖乖就范自动波做功课，他坦承疫情下确实跟仔女关系更好，他们会主动黐住他倾偈，所以他𠱁剧中「两个」囝囝相当熟手，不过他否认是暖男，只识赶一对仔女去父母家，跟老婆余思敏去拍拖。演抑郁症患者更考起Ronald，事前除做大量资料搜集，仲要靠回忆当年在航机上醉酒闹事后，那种抑郁绝望心情帮助投入角色。撰文：杜淑霞 摄影：李维隆 发型：Horace@hairplay_hk 化妆：Mon Chun @monzichunmakeup 服装：@initialfashion @initialgentleman

近年主力拍电影的郑中基，继02年TVB剧《我要Fit一Fit》，相隔18年再参演港剧，只因剧本够吸引贴地，「我见到好多剧个古仔都系好复杂嘅，呢套完全系讲人性，入面讲大家日常会遇到嘅事情、困难、或者工作上有啲咩不如意，好贴地。」


心痛囝囝学业

剧中饰演Ronald囝囝「暴龙哥」由两个不同年纪小演员担任，刚好跟他9岁囡囡Emma和5岁囝囝Evan年纪相若，合作相对较易，「大嗰个教我打机，细嗰个会叫我变魔术。自己有小朋友都有帮助，起码有耐性啲先，同埋会捉到多啲佢哋嘅心理，因为佢哋唔系演员，真系小朋友嚟！」成功跟小演员做friend的Ronald，𠱁囡囡做功课更加有独门秘方，「我会同佢倾，玩唔系唔畀你玩，你做晒功课，譬如你5点做晒，你玩到瞓都得，你系唔做系咁拖嘅话，咁你食完晚饭又要做，你自己拣啦！你想食完饭同细路玩，定系食完饭细佬玩，你做功课？咁佢自己会谂罗！佢就会话『咁我𠵱家做罗！』自己愿意去做嗰样嘢，好过你迫佢，佢觉得你迫佢咪写两只字，又去厕所又肚饿，佢自己选择咗会系咁做，好快话做完。」


疫情下Ronald工作量少了，但争取到更多亲子时间，「呢排叻咗同佢哋玩游戏！以前我每日对住佢哋得几个钟头，𠵱家变咗得几个钟头唔系对住佢哋，关系好咗嘅，佢哋又冇咁惊我，平时少见会黐阿妈多啲，爸爸只系玩㗎啫！一有问题佢哋问番妈咪，但𠵱家知道爸爸只系出去做嘢，𠵱家多咗要求同爸爸倾偈。」不过疫情令Ronald心痛囝囝学业，「我觉得个仔嘅学途好惨，佢今年升K3，之前K1成日爆手足口病冇得返，K2就（社会）运动又加埋疫情，所以嗰两年都唔知读乜！反而𠵱家开心咗，见到其他小朋友，佢之前好锺意打机，都打到话唔想打，哗！你生性呀！疫情冇得出街，所以佢一见到小朋友好开心，唔懒牀好早起身着定校服返学。」

自问不算暖男

Ronald承认今次接该剧，也为了一对小朋友，「呢套可以畀佢哋睇，可以畀佢哋问问题，譬如暴龙哥（《低俗喜剧》）嗰啲佢问问题，我答佢唔到啦！哈哈！」他又透露5岁Evan好奇小演员演他儿子，「佢有问点解唔系搵我，佢系边个嚟？我话呢个演员嚟，佢同爹哋一齐做戏。哦！唔系真系自己仔女做，所以你冇带我哋去啦！先生问佢爹哋做咩？佢识话拍片嘅。」做慈父难唔到Ronald，但他自问做暖男未够班，「最叻系我赶咗佢哋（仔女）去嫲嫲度，我哋可以去街，哈哈！我哋出去工作做嘢，成日话大压力，但系佢（太太）喺屋企照顾小朋友，都压力好大，唔单止凑仔，啲功课仲难搞，所以都要平衡返。」




剧中Ronald觉得最难是演抑郁症患者，要靠回忆人生最低潮，因飞机上醉酒闹事令事业一铺清袋，「嗰时真系谂到最负面乜都冇可以点呢？好彩嗰时好多朋友嚟同我倾偈，畀意见去上堂学剪接、影相，咁就开始学摄影，一路学个人心情慢慢好返啲。（经历帮到演角色？）都有㗎！最主要系当刻嘅心情，导演叫你一阵做啱啱你死老婆，都即刻做到。」