【独家】《大海男儿》任务刺激又惊险 吴启洋欧镇灏叶振弘晕船浪呕到怕

Phoebus（吴启洋）、George（欧镇灏）及Marco（叶振弘）去年参加《全民造星II》，经过一年时间，终于有机会担正ViuTV正播出的旅游真人骚《大海男儿》，带大家游山玩水，有挑战性够搞笑之馀，亦不乏资讯性内容。三子算是熟水性，依然逃不过被制作组玩残，日日晕浪呕住开工，即使过程辛苦，但他们都觉得机会难得唔会后悔参加！采访：杜淑霞、何蔓琪 撰文：何蔓琪 摄影：张咏森 服装：FIVE CM (IG: five_cm)

过程五味杂陈

节目每集会抽签选出一名「船长」，赋予其指挥另外两位「船员」的权力，而「船员」需绝对服从。Phoebus参加《全民造星II》成功夺冠，入行前做过模特儿，幕前经验最多，又是三人中最年长，但竟然只做了一次「船长」，「基本上除咗第一集，我都冇点做过船长，每次都抽唔中。」不过今次的真人骚夥拍《花姐ERROR游》系列的「痴线」导演Mike，故大家异口同声都认同「船长」角色只是傀儡，「船长只系幕前最大嗰个，导演始终系最至高无上，佢讲咩我哋就要做咩。」

即使过程中有不同要上山下海的挑战，他们都大呻最辛苦始终是晕船浪，即使食定晕浪丸都冇用。George直认忽略了艇仔晕船浪的威力，Marco补充说：「第二集地点嘅水流比较急，唔用力划船嘅话就会撞到礁石。」头晕亦令众人开始呕吐，Phoebus表示：「有时大家见到镜头只得一两分钟，其实成队Crew系要上另一座山拍摄俯瞰嘅画面，我哋等嘅时候要喺海中心飘流，好易晕船浪，我同Marco就咁失咗手。」George则十集都没有呕过，除了比较幸运，全因他在大家最「呕」心沥血的一集走咗去瞓觉。Phoebus玩踢爆说：「有集撞正1号风球，我哋要凌晨出海，当时架船好似过山车咁。日出之际，（制作组）捕捉到好多呕（嘅画面）。个太阳好靓，但我哋就呕得好犀利。」

谈到最难忘的经历，三子即提到一个大伏，「啱啱学完自由潜水，导演就话『我哋Enjoy吓，带大家睇吓香港嘅海，睇吓珊瑚』。」当时他们十分兴奋，以为终于有机会可以放松，谁知制作组却带他们到一个神秘景点，「嗰度有几十条攻击力非常强嘅鱼，（我哋）要跳落水寻找一啲嘢。危险程度应该系最高，因为连神秘景点嘅老板见到都好唔放心，老板仲话冇人试过咁做。」几乎每集都与船长之位无缘的Phoebus，继续「黑仔」到底，要接受这个鱼池洗礼，令他大呼：「（做水手嘅感觉）就...唔系咁舒服嘅，不过节目需要我都会咁做！」被问到如果再有做船长机会，会对两位船员下达甚么指令？Phoebus想也不想话，会叫Marco和George代替他落水，十分搞笑。

渴望回归初心

在等待与观众见面这年，三人各有各搞作，Marco除了继续上堂恶补跳唱实力，亦参演预计明年播出的ViuTV原创剧《太平纹身店》，「《大海男儿》系我第一个（见街）节目，头一两集好紧张，不过同队友以及制作组都相处得好舒服，适应咗就越嚟越轻松。」George和Phoebus今年1月就有份与ERROR合作真人骚《全民来电》，George表示：「《全民来电》系慈善形式，所以成个人比较含蓄，今次放晒个人出嚟，都担心自己是否Handle到，好彩有导演嘅指导同三（两）位嘅包容。」Phoebus认为《全民来电》令他对真人骚改观，「之前对综艺认识唔深，拍《全民来电》发现实况节目比较适合自己，对户外去玩、去挑战有多啲兴趣。同埋好荣幸可以同Mike导演合作，佢有表露主持真实一面嘅能力。」

担大旗体验过综艺节目后，虽然仲想试多些其他工作，但讲到要在唱歌、拍剧、综艺、主持四者之间抉择，George不假思索便说：「实拣唱歌！不过唔系唱情歌，我比较想挑战Rap。近年香港比较少呢类型嘅歌手，好似台湾嘅周汤豪咁，我目标系将呢类型音乐带入香港。」他更透露自己有开始写Rap歌词，当写出满意的作品，一定会放上YouTube同大家分享。Marco亦认同：「就算要四拣一，我都系拣唱歌。始终唱歌系我最钟意同做得最耐嘅嘢，虽然呢一刻未必系唱得好好，但我愿意投放更多时间落去。」至于Phoebus就心大心细话：「我都有啲纠结，但参加《全民造星II》嘅初衷就系因为钟意唱歌跳舞，我练舞比较多，亦摆咗好多时间落唱歌，所以出歌会系首选。」