【独家】被前度张致恒伤到入骨 32E庄韵澄拒绝得个样男人埋身

庄韵澄（庄端儿、Xenia）曾经同张致恒拍拖4年，其间最出名当然是男方不停被踢爆有小三出现，结果两人最终分手收场，虽然事隔4年，呢段情伤仍然对Xenia好大影响，她除了最近在ViuTV节目《吃掉前男友》提到渣男前度时爆喊外，Xenia接受《头条日报》访问时，提渣男前度亦句句有骨，她讲明「应付过咁厉害」前度后，令她更审慎拣对象，所以一直单身，她𠵱家搵对象唔会再搵冇责任感、唔成熟、得个样嘅对象，快将38岁的她更以结婚为大前提，更唔排除随时闪婚。撰文：杜淑霞 摄影：李维隆

庄韵澄在昨晚首集《吃掉前男友》时，再度剖白与前度张致恒分手感受，从未试过有男友咁多外遇，当男方第二次出轨事件，她更是透过记者得知，更踢爆前度极度渣男行为，「嗰阵我同佢讲呢个系我最后一样可以帮你嘅嘢，你想我点回应记者？」岂料，男方竟开心话：「咁你话我哋分咗手喇！咁咪唔算偷食罗！」

这段情后Xenia一直单身，她坦承因被渣男情伤太重，「伤得都的确重嘅，以前嘅拍拖唔会系面对全香港，唔会登报纸，唔会咁大压力，唔会要解释，嗰阵时我选择唔讲任何嘢，𠵱家我应付过咁厉害嘅男朋友之后，我真系对拣男人嘅眼光系好咗嘅，雪亮咗嘅。」现在Xenia深信时间认清一个人，亦不会再哑忍渣男，「嗰时公开咗先知系咁大件事嘅，因为有拗撬有第三者，但啱啱先公开，会好似畀人玩咁，自己会有个唔忿气喺入面，于是咪忍罗！会尝试同佢克服或者解决，嗰阵时我都好唔果断，为仔死为仔亡，都系付出型嚟。」

唔排除闪婚

有过这个深刻教训后，Xenia坦承拣对象会更审慎，不会随便开始一段关系，「我以前个男朋友做啲嘢好细心，好识得𠱁女仔，当然追你嘅时候系会就住你喜好去做，你都开心嘅，因为你有好感嘛！但系就唔会识得分析佢系咪同时对好多女仔做啲咁嘢啦！𠵱家都会多咗啲嘢去谂。以前会觉得人哋对你好好呀！好细心，呢个条件好好不如就同佢开始试吓啦！自从同先前男朋友后，觉得开始一段关系好容易say个yes，或者一啲行动就得，但系你要结束一段关系系好痛苦，我同前男友唔系第一次分开，有少少离离合合，嘈过吓交，又会一齐又𠱁番，经历咗一段几折磨嘅时间，所以𠵱家忍得好多，唔会话佢对你真系好细心，喺指定嘅时间搵你，帮你开晒车门，或者帮你做好多嘢，总之就随传随到，唔会话因为呢一样嘢。」

Xenia坦承以前是外貌协会会长，拣男友最紧要靓仔，但经历过前度这个人版后，拣男友的条件都改变埋，「外表冇话一定要超靓仔，靓仔梗系好啦！都唔会蚀咁多嘛！外表乾净企理，你会见到鞋、衫，冇味呀，我都几注意味道，味道我着紧！𠵱家真系注重沟通罗！外表已经冇咁紧要，你话大年纪定细年纪？我梗系想大过我啦！但大过我嘅选择唔多。另外，最紧要有责任感（之前嗰个全港人都知佢冇责任感！）佢得到佢应有嘅惩罚，佢𠵱家要好有责任感，佢要养家，要养三个人，佢再唔节制落去生第三个就大镬啦！𠵱家拣男人要好有责任感，知道自己做乜先，好清色晰有自己目标。」她又自言不急于搵对象，「但如果遇到啱会把握机会开始，到时真系闪婚都唔出奇。」