【独家】加国避炎返港演艺工作全停　亚姐颜子菲乐观操Fit等开工

2008年亚姐亚军颜子菲真黑仔！话说年初爆发新冠肺炎，她2月即飞回加拿大探亲兼避炎，岂料当地开始爆发疫情并「封国」，结果量地大半年终接获两个Job，原定8月开工的子菲即提早回港隔离，无奈坐足15小时飞机，一抵港便收到通知工作取消，5位数酬金瞬间变泡影，连机票钱都蚀埋！她唯有勤力健身Keep体能，随时以最佳状态示人，终于在本月初「复工」教Pilates，KOL工作亦都陆续有嚟。撰文：黎宝伦　摄影：谭壹致　髪型：Bruneblonde - Van Chan　场地：Yuj Yoga Studio

近年，颜子菲以MC Job及教健身、跳弹牀为主要收入，她表示：「疫情前Keep住一个月起码两、三个Job，大时大节都会多啲，例如年尾Annual dinner、春茗、倒数，差唔多一个月多5、6个。疫情后，好多Job都取消或延后，而我一直教班嘅Studio喺愚人节宣布结业，令我冇咗份稳定嘅收入。（有经济困难？）喺香港都系交租，自己都有储钱，家人都呢度畀啲嗰度畀啲，好悭咁使都搣到年尾，开餐厅嘅朋友都好照顾我嘅饮食，好好彩。」

改变硬颈唔衰得性格
此趟长留加国陪家人，子菲直言改变了其硬颈、要面的性格，4、5年前曾于面店做打杂的她说：「以前就算要去餐厅做侍应赚50蚊一个钟人工，都唔会同屋企人讲自己唔掂，因为当初一个人返港，希望有好成绩畀佢哋睇，自己亦唔想认衰。而家觉得呢个心态好无谓，家人最关心你过得好唔好、开唔开心，我学识唔好畀自己咁大压力，今次返去家人同我讲『如果需要帮手可以开声，唔使撑得咁辛苦』，好感动。」过去执着于频曝光，子菲现时认为家庭第一，演艺事业第二，「始终对拍戏好Passionate，无论角色有冇台词，对我嚟讲都系一种享受，而演员喺体能上有好大要求，所以我都Keep住健身令自己冇咁易攰。」