【独家】搵女神做MV主角 AK@MIRROR大赞沈殷怡正

AK@MIRROR（江𤒹生）早前推出由队友Ian度身作曲的《蜗牛》，内容是他以往爱情经历，他坦承以往不算体贴的男友，有时真的好似「蜗牛」比较迟钝，觉得工作同跳舞比女友更重要，搞到分手收场，他坦言若再拍拖一定更重视女友。讲到亲自搵女神沈殷怡客串做MV女主角，原来两人早在未入行已认识，他更大赞对方各方面条件完全达女神级，可惜本身不是对方杯茶。撰文：杜淑霞 摄影：李维隆 发型：Denny Ku @ Chic Private I Salon 化妆：Giann Cheung @Annie G. Chan Makeup centre 服装：Ralph Lauren

首次听到《蜗牛》AK已经觉得锺意，监制徐浩提议搵林若宁填词，更将他的爱情故事渗入歌词中，「点解叫《蜗牛》，因为我嘅故事其中一part就讲，我送呢个女仔返屋企，佢提我行楼梯唔好踩到啲蜗牛，我嗰吓就觉得呢个女仔好窝心好sweet，林若宁应该睇到呢段，然后用蜗牛去比喻喺感情上嘅后知后觉，或者同女友唔同步。」

AK都坦承对感情比较迟钝，不算体贴的男友，搞到次次拍拖都散，「拍拖唔系十分之了解女朋友嘅人，譬如做紧嘢嘅时候收到一个message，女朋友话我好肚饿，我好单方面谂咪去食嘢罗！但嗰句后面嘅意思系你可唔可以嚟陪我食嘢，但系我永远get唔到呢啲，一次就话OK，次次咁样女仔就会唔开心。我以前拍拖系好自我，嗰日拣咗去练舞，我就咩都唔理㗎啦！以前拍拖永远都唔系我首选活动嚟，呢个问题令到我每次关系导致分手。」




今次《蜗牛》AK搵来女神沈殷怡出任MV女主角，原来两人早于10年前参加歌唱比赛已认识，其间因阿沈到外地升学失联，直至在ViuTV重遇。AK坦承阿沈绝对符合其择偶条件，「我自己系超级外貎协会，觉得佢系好靓嘅女仔，好锺意佢嘅气质，内在美好靓，又读好多书，识好多嘢，佢嘅谈吐真系好大方得体㗎！我锺意啲可爱多于好hot好sexy嘅女仔，无论系性格上定系样貌都锺意啲sweet啲嘅女仔。」讲到两人有否发展机会，他报以一个傻笑，继而推说：「佢锺意嘅类型同我好唔同，佢锺意陆永、方大同，佢锺意啲戴眼镜白白净净斯文嘅男仔。」