【独家】努力造人望追个囡囡 黎诺懿庆幸太太非疫情下陀Ｂ

黎诺懿在剧集《C9特工》饰演特工「B3」，他虽然剧中演特工好有型，但现实中他更享受做个贴地大叔，热爱家庭生活的他，平日不是陪太太和囝囝小春鸡，就是种花煮餸。他自爆想操到满身肌肉，跟囝囝影辑写真相，另外又积极跟太太努力造人，望追多个女「收工」，虽然在纯天然下未有成绩，但亦庆幸太太不是在疫情下陀Ｂ，否则会好担心。撰文：杜淑霞 摄影：李维隆 场地：Greyhound Café Galleria

在《C9》好鬼有型又打得，但现实已踏入40岁的诺懿自认好麻甩，「太太成日讲唔使返工嘅时候，有两个地方一定搵到我，一间好地茂嘅云吞面铺，同埋花街，因为我好锺意种植物，老婆都话我成个阿叔咁，几时去埋雀仔街。」他连跟老友郑伊健话题都转变埋，「我识伊健咁耐，以前埋牙讲玩乜买乜，𠵱家埋牙就倾最近有啲咩神医、骨医，互相介绍去试，话题随住年纪改变。」

诺懿仲搞笑爆，太太李洁莹会经常提醒他要保健身体，「老婆成日叫我去睇中医，又成日话你个仔得3岁，你要锡住身体，拍嘢唔好乱跳，连助手仔都系咁提我，好彩好多嘢后生做咗，𠵱家真系会多咗啲顾虑。」不过他想趁变真正大叔前型多次，「希望40岁时可以揽住个仔成身肌肉，一排排嘅咁样影辑相，同埋太太好锺意睇韩剧，啲男主角都除衫，老婆又话你睇人哋！」



锡身的诺懿坦承为追多个囡囡铺路，「希望啦！到我有日公布可能都系仔，因为我哋系纯天然，唔想逆天而行拣性别，但所有风水师都泼我冷水，佢哋话第四个有机会系女，我想剥佢哋牙骹。」他更讲明会偏心囡囡，「我嘅教育系男仔嘅物质上嘅唔会畀，当然女仔调返转晒，女系要锡，作为爸爸系希望将所有嘢留畀个女。」虽然诺懿跟太太努力造人一段日子，但反而庆幸未有声气，「今年冇都唔系一件坏事，如果太太喺疫情有咗BB，我喺生活同工作上有好大改变，可能唔系太重要嘅工作我会唔接嘅，好怕传染到佢，所以可能连《刑侦日记》都唔会接，因为唔可以戴口罩开工，所以都算错有错着。」