【猴擒揽拖】翟伯伯向陈倩扬细女跪地求婚　林芊妤：唔好咁快落订，睇定啲先

「翟伯伯」翟德彦进入「引退KOL界」倒数阶段，妈咪林芊妤（Coffee）近日密密Po囝囝萌照，帮一众「伯伯粉」慢慢搣甩铺瘾。昨日Coffee带囝囝去拍片，同场仲有一个小女孩，那就是陈倩扬（Skye）的细女Aurella。事后，她于社交网上载一条现场花絮片，并留言：「今日带埋BB去拍片，点知原来佢比我想像中主动，第一次见就拖姐姐只手仔，之后仲要认真到求婚。」片中，1岁多大的翟伯伯居然一路拖实Aurella，就算妈咪拉走、B女逃走，他都唔愿放手，仲拖住对方行近窗边一齐睇风景，之后更忽然向Aurella「跪地求婚」！

看见此情此景，两位妈咪都兴奋都尖叫狂笑，Skye即同「未来女婿」笑说：「唔使咁快（求婚）住，可以认识耐啲先㗎。」Coffee亦打趣道：「唔好咁心急，而家唔系以前年代盲婚哑嫁，我哋有多少少时间，唔好咁快落订呀，睇定啲先！」不过翟伯伯就懒理两位家长，仲一度想拖走Aurella远离二人，冇晒符的Coffee后来索性帮囝囝催谷这段「姻缘」，直接怂恿翟伯伯给Aurella一个「爱的抱抱」，惜Aurella比较怕丑，一手推开对方，连Coffee都搞笑留言：「有新女朋友，但女朋友好似唔骚佢。」而Skye就爆料：「妹妹第一次同两个哥哥以外嘅男仔拖手仔……有啲怕丑𠻹，威猛彦彦细妹妹三个月好有哥哥风范呀。」认真爆笑！