【头条独家】自家低醣饮食法激减29磅 陈倩扬成网络减肥红人

现年36岁，育有两子一女嘅前港姐陈倩扬，两年前生完细女Aurella后身形暴肥到160磅，虽然后来体重回落到135磅，但出镜仍然唔好睇，所以由去年9月1日开始，决定挑战「低醣减肥法」，至今回复返做女时106磅嘅苗条身形，还在网上开设减肥团，为唔少肥师奶及肥OL重拾自信。采访：方骞平 服装：MZ JJ 场地：怡红院火锅料理

陈倩扬自创食得饱，冇压力减肥方法红遍网络，她常以「过来人」身份分享低醣饮食餐单及生活，Facebook专页已吸纳约6万多粉丝支持，而减肥团都有2万几成员加入，喺倩扬同成员互动下，好多妈咪、OL成功减到肥，之前为咗表扬学员Karly减肥成果，特别安排对方影婚纱相。

分阶段减肥
倩扬减肥行动分两个阶段，第一阶段嘅6至8星期内，每日最少饮2公升水，戒甜及零食，减醣餐单重点避免摄取白饭、白粥、河粉及面包等「精制淀粉质」，踏入第三星期就可以食「原形淀粉质」如糙米、藜麦、蕃薯、南瓜、粟米、红菜头等补充。午餐要摄取足够蛋白质，肉类可选三文鱼、鸡扒、牛肉及虾等。整体食材比例蔬菜占大约60％、蛋白质40％，因为下午经已食到好饱，晚餐只食烚菜一碟。至于第二阶段嘅3餐要缩短到早上10时至晚上6时内完成。

她兴奋说：「其实我唔系乜嘢减肥达人，只系属于团员嘅师姐级，要边做边学，我都冇谂过有咩商业上得益，佢哋肯信我经已好开心，经营一段婚姻及家庭唔容易，妈咪健康啲，Fit啲，成个人会更有自信及动力，我老公唔系跟足嚟食都瘦咗成10磅，冇咗个肚腩。」