爱犬患淋巴癌第5期  许亦妮自责生女后忽略照顾狗狗 

前港姐许亦妮（现名许芷荧）下嫁家族过亿嘅Alexander后，今年2月荣升妈咪，诞下宝贝女「冯宝宝」，虽然有咗BB女，但坚持做一个好有责任感及有爱心嘅好主人，依然对雪橇狗Cooper及Enzo如珠如宝。

 

她昨日喺社交网站无奈指Cooper患上淋巴癌第5期，要马上进行化疗保命！庆幸 Cooper完成第一次化疗后，精神及胃口也改善了不少，又反而自责诞下女儿后忽略爱犬，今后会更珍惜与Cooper相处的时光。

 

Whitney忆述Cooper由发病到治疗经过说：「2020年8月23号，晚上我听见狗狗Cooper 抖气好大声！感觉一定有啲问题出现，谂住观察几日，点知情况冇改善，然后有一日，我摸佢个头同颈，摸到颈上面嘅淋巴已经发到好大！即刻book医生睇！

 

2020年 8月28号，医生已经初步确定佢系应该有淋巴癌。我哋问医生通常咁嘅情况仲有几耐命？医生话，如果乜嘢都唔做，可能得返几星期，食类固醇可能有几个月，如果身体情况许可，做化疗的话，可能有多12至18个月。知道咁嘅情况，嗰刻真系晴天霹雳！心里面谂：『点会咁㗎！点会嚟得咁突然？我仲有好多嘢想同佢一齐去做，亦都好多自责嘅感觉，觉得点解冇早啲帮狗狗发现呢个病？又或者系咪有啲乜嘢自己做得唔好，令到狗狗有咁嘅情况？』

 

2020年9月1号，我哋立即带狗狗去专科嘅兽医医院去见癌症科医生。做晒所有检查，之后确定Cooper系患上了淋巴癌。医生话，Cooper应该是癌症第5期了，而且cancer 嘅毒素好高，要即刻做化疗保命。

 

2020年9月2号，Cooper第一次做化疗，好感恩 Cooper做完第一次化疗情况已经有好明显嘅康复！即刻精神咗好多！胃口亦好好！医生话，通常淋巴癌复发嘅机会都好大！ 所以我哋大家都好珍惜同Cooper可以继续见面生活嘅日子。买多啲生日蛋糕同俾多D啲Pizza畀佢食。其实我觉得，呢个系上天畀多一次机会我哋好好珍惜同爱Cooper。我自己亦有自我反省，觉得自己生完冯宝宝之后好似冇咁关注Cooper同Enzo，亦有可能因为咁，令到佢哋唔开心，其实狗狗会感受到的，当佢哋被忽略，或者唔开心，都会同人一样可能会病。亦有一个灵性角度嚟睇，可能狗狗会觉得自己嘅使命已经完成，我哋已经唔需要佢，所以系时候去彩虹桥。所以上天现在畀多一次机会我去好好珍惜，我都会尽我一切能力，将时间同爱分配得更加平均。Cooper 将会要做为期六个月嘅化疗，每星期做一次！希望一切顺利！感谢上天，给我们多一点时间！」网民都留言叫她及Cooper加油，也大赞她是个好主人。