【独家】抗疫断六亲一周买一次餸　许芷荧为B女变紧张大师

近日本港爆发第三波疫情，街市成为染疫高危地方，前港姐许芷荧（前名许亦妮，Whitney）早前也提醒大家，小心银纸和硬币沦为「播毒」途径！为保护B女，由怀孕至今Whitney都好谨慎，除出街戴齐「防疫孖宝」口罩和眼镜外，回家后更会消毒货品和钱，当事人也自嘲：「我会拎住支消毒酒精周围喷，可能啲人都觉得变态，哈哈！」采访：黎宝伦

今年2月荣升妈咪的许芷荧遇上新冠肺炎疫情即变「紧张大师」，她坦言自怀上「冯宝宝」Kayli Jane便高度戒备，每次岀街都会周围狂喷消毒酒精，「好夸张，嗰阵就生时爆发新冠肺炎，我精神紧张得好紧要，因为好担心BB有事，所以好多嘢都清洁得好彻底。」见近日疫情严峻，Whitney亦加强家居防疫措施，除了将刚购入的商品及蔬果一律清洗乾净外，她更会用UVC灯照银纸，并分别用水及洗洁精、滴露洗散银，她说：「虽然唔知咁做有冇用，但洗完安心啲、乾净啲，始终啲钱好多人掂过，劲多菌。」

做YouTuber分享下厨心得
为减低感染风险，要照顾老公和囡囡三餐的Whitney，现时尽量一周去街市和超市各一次，老公Alex就做「柴可夫」管接送，「而家要一个礼拜前谂定哂煮乜，因为要一次过买哂啲餸。其实我都冇见家人成个月，呢个时候要好好保护自己同BB，所以几挂住都要忍。」幸好她一向是「宅女」，故长期「闭关」都冇问题，况且主妇生活忙碌，Whitney续道：「每日凑B又要陪老公、煮饭已经好攰，根本冇时间闷。（好辛苦？）又唔系嘅，我都好Enjoy。」除此之外，最近她亦忙于为自家YouTube Channel制作短片，稍后会跟大家分享下厨心得，至于造人大计？她笑说：「老公好想追个仔，但我想畀多啲Attention囡囡，同埋等自己再Fit啲先啦，否则好难减，我唔想变肥师奶罗！」