【独家】赞陈豪事业家庭完全兼顾到 李佳芯目标要做包租婆

TVB热播剧《杀手》收视报捷，最新跨平台收视有31.3点。剧中李佳芯（Ali）相当抢戏，完全发挥到师奶仔「Cash」的贪钱本色，演技获赞。一度被指事业告急嘅Ali，落实于8月中拍新剧。对于近年事业高低起伏，她说：「眼前有乜路就行好嗰条路，呢个方式系最简单，就算面对疫情所持态度都系一样。」采访：方骞平 化妆：Evelyn Ho 发型：Ziv Lau @il Colpo 服装：Claudie Pierlot Paris

剧中李佳芯情倾浪子「Zero」陈豪(Moses)，戏里戏外，Ali对陈豪都高度赞赏：「愈合作得耐，愈觉得佢好犀利，佢好似唔使瞓咁，就算收工几夜都好，一早仍然会凑小朋友返学，仲会keep住食白烚嘢、做运动。」眼见Moses有个温馨嘅家，跟陈炳铨感情稳定嘅Ali可有谂过变身陈师奶？她笑说：「我𠵱家最想做包租婆，等我喺呢两年做吓功课先，至于结婚更加随缘，当两个人结成一体，一加一唔系等于二，只系减为一，最紧要系有呢个冲动，冇得迫对方，我又唔心急。」讲到男方陪住她走过事业低潮，系咪会更加珍惜身边人？Ali即笑说，「哈！我都有陪伴佢嘅时候，而且一向好珍惜身边人，唔关高低潮事。」

见步行步最实际

Ali又大谈对近年经历嘅感受：「唔只系我，全世界人最大感受系疫情，天灾人祸随时会出现，所以以前定下嘅计划，想做啲乜，搵几多钱，攞乜奖，其实身外物唔重要，最后回归返有冇健康身体，身边有冇爱你嘅人及你爱嘅人，有冇时间陪伴对方。人去到某个阶段，当你面对控制唔到嘅嘢，包括疫情、失业、健康等问题，人可以做嘅嘢唔多所以无力感好大，最简单系眼前有乜路就行好嗰条路，呢个心态每个时候都用得着。现阶段无论事业、健康及朋友都平衡得最好，反而最enjoy，最舒服。」