【独家】放养式教育　仔女出街狂跳碌沙发　陈茵媺拒做「虎妈」唔打唔闹

「模范夫妻」陈茵媺（Aimee）和陈豪（阿Mo）自小于外国成长，所以凑仔方式都好「西化」，即采取「放养教育」，让子女多接触外界、自由发展。好似日前Aimee就带大仔Aiden和二仔Nathan去行山，探索唔同品种嘅昆虫及植物；之后一家五口去海滩，两夫妇又睇住3个宝贝喺浮台跳落海，Free到爆！而早前趁疫情缓和时，Aimee终带仔女「出城」，她凑完Nathan去浅水湾食Tea后，另一日又带埋饼印孻女Camilla去行街，其间两只马骝High爆狂跳兼碌沙发，不过Aimee并冇喝骂，继续笑笑口好优雅。采访：张咏森

疫情爆发期间，陈氏一家都好听话冇周围走，只系间中「闭关」太耐，两夫妇先带3个小朋友去南湾寓所附近、人烟稀少的山径及沙滩唞唞气，顺道进行户外学习。记得陈茵媺讲过，唔会做「怪兽家长」，尽量放手畀小朋友尝试，从而训练他们的自信心，所以平时都任由仔女发展，成功养育出乖巧听话又独立的3个宝贝，难怪老公陈豪也赞老婆好本事！

活泼二仔
早前于第三波疫情爆发前，Aimee凑住刚放学的Nathan到浅水湾食Tea，两母子在西餐厅叫了两份All day breakfast share食，在妈咪分嘢食期间，古灵精怪的Nathan忽然将块柠檬摆入口，结果酸到乸口乸面，身旁的Aimee就好淡定扮睇唔到，但其实隔住个口罩都见到她偷偷笑到眯晒眼。其后发现记者，Aimee又叫囝囝对镜头Say hi，点知Nathan萌爆挥完手，即怕丑到缩落枱底，超搞笑！食饱后，二人便到超市买芒果、橙和橙汁，其间囝囝仲好似树熊咁揽实Aimee，好鬼Sweet。

跳到甩帽
事隔4日，Aimee带埋二仔和细女Camilla去IFC行街，当妈咪在拣鞋、试鞋时，坐唔定的Nathan就一路喺沙发上「健身」，不停碌嚟碌去玩到四脚朝天，Aimee冇开声闹，而跟她饼印一样的Camilla就似足妈咪咁Elegant，全程安静坐喺度等。买到一袋二袋的Aimee都好识做，奖励陪逛的仔女食乳酪，Nathan一见到即兴奋到手舞足蹈，Aimee还展示臂力逐一抱起拣口味；等极未有得食的Camilla，卒之都忍唔住跳高睇吓整好未，见小妹妹弹弹吓连帽都甩埋，妈咪唯有攞杯试食畀囡囡顶住先，Camilla接过即拉低口罩慢慢品尝，为食样劲得意！