【独家】拍《杀手》伤痕累累龚嘉欣唔谂结婚向视后进发

2020-07-23 23:00

龚嘉欣喺新剧《杀手》中饰演癫丧嘅Dark Angel，同黎耀祥打戏连场，拳拳到肉，表现获赞，打到伤痕累累的嘉欣，至今右手指尾仍然留有后遗症，因为韧带曾撕裂而搞到变形。嘉欣强调从来冇埋怨：「我系一个捱得苦嘅女仔，OK啦，都系值得嘅，因为要尽力做好件事。」采访：方骞平化妆：Henry Li 发型：Sue Cheung 服装：kate spade 饰物：Atelier Swarovski 鞋：Rene Caovilla

龚嘉欣为拍新剧《杀手》牺牲好大，头发要铲青，又要性感Look丧打，更要被黎耀祥摸胸，好彩剧集出街后反应好好，都算冇白费心机：「朋友以为我打得好流，睇完就劲赞，话冇谂过我做到替身同武指嘅效果，镜头前播嗰几分钟动作镜头，其实拍咗成日，每日同祥哥(黎耀祥)开工前都会叹一口气，唔知今日点算好！」叹完气之后呢?嘉欣笑言，「叹完气咪硬住头皮埋位罗，不过出嚟有咁好效果都系值嘅，就算留有少少伤疤，我都唔系好在意。如果下次开Part2再做打女，我一定拉埋祥哥落水，哈！佢系我戏内戏外嘅好拍档嘛！」

玩人哋个B一样开心
除咗打斗要求严格外，龚嘉欣试过做唔到一个表情而眼湿湿：「我要澄清，监制陈维冠冇闹过我，相反好鼓励我哋，只系我忟自己啫！」戏中Dark Angel好重感情，会为所爱而争取，现实中的嘉欣坦言感情随缘，唔会谂太多嘢：「几时结婚生仔控制唔到，但喺事业上，可以好清晰咁定下目标，𠵱家我30岁，希望可以再探索多啲嘢，当然，4年前拎过女配，下个目标系视后。𠵱家未系时候结婚生B，惟有做住保母先，玩吓人哋个B一样好开心。」