【独家】唔系讲笑 00后真系唔识佢　陈慧琳行超市买M巾冇人理

近日网上疯传一条名为《00后唔识郭富城？四大天王系边个？》的街访短片，访问对象全是本地00后，好多都数唔出「四大天王」，见到47岁，入行25年的陈慧琳（Kelly）张相更错认为容祖儿！又难怪嘅，呢位95年出道已一炮而红，称霸本地乐坛近20年的天后，自09年诞下大仔「虾饺仔」刘升后，人生焦点亦由事业转到家庭，放慢工作步伐，一切以儿子为先。就算开咗IG，都只系Po吓工作照，冇八卦新闻食唔到花生，00后唔识佢又真系唔出奇。早前，Kelly与女助手到又一城行街，着住花花裤又戴晒大黑超劲有「星味」嘅佢同几个学生哥擦肩而过，咦，学生哥真系零反应喎！采访：谭壹致

想当年，陈慧琳的快歌如《花花宇宙》及《大日子》等唱到街知巷闻，更是K房必点之选，不过而家好多后生仔女都只听K-pop，虽然Kelly两年前曾经推出收录四首广东歌及四首国语歌的专辑《Watch Me》，仲逐首歌拍晒MV，但始终年龄层问题，明嘅。

花碌碌天后行街街
早前下午1点半，Kelly和女助手到又一城Shopping，两人先去书局及LOG-ON睇文具，之后再到运动铺睇波鞋，其间，她睇中一对港币899的「忍者鞋」Nike Aqua Rift，不过试咗上脚、在镜前摆咗一轮Pose，左照右照都唔啱心水，结果乜都冇买就走人。行去扶手电梯时，虽然Kelly戴住口罩及太阳眼镜遮晒样，但白恤衫衬七彩花花裤，又挽住个白色流苏手袋揈揈吓，喺人群之中依然好抢眼，所以都吸引到几个师奶、OL回望兼咬耳仔。不过落咗一层，Kelly即迎面遇上3个学生哥，无奈学生们眼尾都冇望过佢，继续嘻嘻哈哈惦行惦过。

行街有嘢啱预囝囝
随后，Kelly又与助手到超市Taste买嘢，虽然近日疫情于社区大爆发，抢购口罩、厕纸及粮食等热潮再现，但高贵嘅Kelly并没有「盲抢」，只系拣了一支梳打，然后同助手一齐手指指研究M巾，最后擸咗两包超薄花香味日及夜用装。以为Kelly畀完钱就走，可能见到买薯片有赠品送，啲赠品仲要几啱囝囝所以折返买咗4包薯片，再换埋薯片品牌嘅File加公仔毛巾，再将战利品放入助手嘅环保袋，自己就捧住包大薯片和支装饮品，双双到底层乘车离开。