【独家】教整健康饮品变瘦身KOL 傅颖急买新运动衫裤上镜用

去年由内地回归香港发展的傅颖(Theresa)话咁快35岁，返港后撞正社会运动同新冠肺炎疫情，所以Theresa都冇乜工开，好彩世上有ig。之前Theresa玩微博玩得好疯狂，而家玩ig亦玩得好癫，日日都有Post，仲系咁拍片教人整健康瘦身饮品同食品，变瘦身界KOL成日要出镜，所以日前见佢去买运动裤，无得试，斋摸质地都照入手，睇嚟赶住用。截稿前得知Theresa嘅ig被删除，原因系含有暴力内容等问题，乜都冇晒，惨嘞。
采访:梁志明

Theresa近年努力减肥瘦身，仲搵健身教练同佢操肌肉，想瘦得嚟又有肌肉，线条靓啲着衫又靓啲，话晒单身，明嘅。加上同吴千语拍紧ViuTV套新剧《熟女强人》，两人有感情关系，仲会有锡锡镜头，唔知有无床戏或性感演出，咁Fit啲出镜又好睇啲，最重要吴千语细Theresa九年，又系明晒。

冇得试都买
日前下午，着住Oversize Tee同黑色Legging，戴住粉红色Cap帽及口罩，孭住tote bag嘅Theresa独自去铜锣湾希慎睇运动衫，期间都几多电话，逗留15分钟，佢乜款式都睇，沉色鲜色一样啱，佢全程系咁摸啲衫同裤嘅质料睇吓弹性如何，因为冇得试身，摸咗一轮，最后入手一条运动裤，畀完钱就将战利品放入tote bag，女友人校啱时间到达，两人就一齐离开。