【独家】老婆生B努力搵奶粉钱 43岁陈山聪街头肉搏两粒钟

43岁嘅陈山聪下月荣升爸爸，奶粉同尿片钱都好贵，所以山聪经常将养妻活儿努力搵钱挂喺口边。日前下午，山聪为文伟鸿监制新剧《超能使者》拍外景，剧情讲佢以一敌二，当日气温高达34度，山聪埋身肉搏，拳来脚往打足两粒钟，打到全身湿晒，搵钱艰艰，山聪滴住汗表示，「以前嗰个唔系我嚟，𠵱家好开心，系好嘅开始，所以乜都要勤力啲罗！」采访：方骞平 摄影、李维隆

之前陈山聪喺《两个小生去camping》中毫不避忌，大谈过去「黑材料」，自嘲以往嘅负面新闻全世界嘅华人都知，佢要拨乱反正，面对自己，他还真情剖白：「因为呢啲经历令我𠵱家咁开心，更珍惜身边一切，我希望60岁时，太太同个仔有安定生活。」山聪果然言出必行，脚踏实地努力搵奶粉钱兑现承诺，拍完《超能使者》紧接拍《今宵大厦2》。问到剧接剧系咪BB旺他？他笑嘻嘻说：「都系啦，最紧要开心。」


打到底裤都湿埋

山聪在《超能使者》中有唔少丧打场口，日前先嚟一次小热身，讲山聪拖住着小背心、热裤露腰仔嘅刘颖镟（Tiffany）返屋企煮饭仔，途中见义勇为出手阻止两名歹徒欺凌女人仔甄咏珊。当日天气好热，喺条街拍外景焗到癫，但山聪依然打得相当落力，拍前先试位，一roll机就喺咁同两位动作演员埋身肉搏，箍颈、抓面、反身、起脚、出拳及膝撞等乜都有，打到手臂「老鼠仔」都出埋，仲要垫pad捱木棍打背脊。虽然好多动作都一take过收货，但两分钟镜头都玩咗两个钟，拍到山聪全身湿晒，浅灰色Tee湿到变深灰，连底底都湿埋，成身汗臭味，要急急换tee除臭。而镜头外食住豆腐花嘅Tiffany就大赞山聪好专业。

山聪锺意拍打戏

山聪事后承认冇留力拍：「其实真系好热，所以拍打时真系要专注啲，宁愿用多啲真力，好过留咗力再拍时大家都辛苦，最吃力系要配合监制要求打得型啲，唔好乸埋块面，又要打又要顾住个样真系唔容易。」稍后Tiffany会加入动作行列，陈山聪睇好刘颖镟系新一代打女：「佢手长脚长，打起嚟会灵巧啲，𠵱家要多元化，做新一代打女女神咪好罗，有啲罗拉feel咁！暂时女神就系女神，唔识打。」至于想做女神定打女？Tiffany好贪心话两样都要，打都可以好有型，唔一定凶神恶煞。

问到山聪怕唔怕受伤，吓亲大肚老婆？他即紧张说：「我有派定心丸畀佢，除咗有少少瘀伤，拍咗咁多次打戏都未试过受伤。好多监制觉得我好适合拍打戏，因为我又有咁嘅底子，自己又锺意，只要小心啲就得喇！作为演员多元化好，同埋呢个路线演员唔系咁多。反而有场搞笑戏，我自己打自己再摆个甫士，两个take就拍到肩位瘀晒，连老婆都问我搞乜？」