【头条独家】疫情缓和 一家三口快乐「出关」　直击杜德伟夫妇商场温馨教仔

上月中，58岁杜德伟（Alex）被本报记者发现于中环街头跟太太李晓冰（Ice）闹交，好在事隔一个礼拜后，两公婆甜爆食Tea撑枱脚，一天光晒。日前下午，杜氏夫妇又十指紧扣现身又一城，可能见疫情逐渐缓和，今次仲带埋3岁儿子Alex Junior（AJ）去拣玩具，但小朋友在玩具店兜足几十个圈，妈咪都系唔畀囝囝「添新货」，好彩AJ自备滑板车，踩踩吓就唔记得畀妈咪拒绝过，父母仲买Cupcake𠱁佢开心！望真啲，身形圆碌碌的AJ跟动画《冲天救兵》的童子军Russell有九成似，隔住个Mon都好想大大力搣佢块面！采访：谭壹致

杜德伟与细25岁的李晓冰于2012年结婚，并于4年后诞下金叵罗AJ，老来得子的Alex自然锡到个仔燶，只要一唔使开工就带囝囝周围去，好似近数月受新冠肺炎影响，取消晒幕前工作的他Stay home为自家品牌MNA设计新一季产品外，又经常抽时间陪AJ去行山、露营、摘士多啤梨，前排两父子仲一齐制作爱心蛋糕，尽享天伦乐！最近见疫情缓和，Alex和Ice终于带囝囝出市区，日前下午4时许，一家三口就现身又一城的玩具反斗城拣玩具。

「厕板」失踪
本月中，Alex因做运动扭伤而戴上颈箍，Ice透露老公至少要戴颈箍1个月。当日Alex已弃用「BB厕板」款式，换上一个有Cyber感的轻巧护颈托，上网睇资料，该款颈托最适合低头族及打机人士，绝对啱晒长期玩手机的他！小朋友入到玩具店必然花多眼乱，见AJ睇完一轮面包超人玩具后，又走到另一货架左摷右摷，可能见囝囝心大心细慢吞吞，成日忍唔住周身郁的Alex都闷到揿电话，之后仲拉埋老婆去侧边睇水枪，其间他又将双手放在背后向后拉，舒展筋骨。

迷你板仔
最后，AJ拣了一件森林家族的玩具，但妈咪叫佢放低，小朋友觉得好冇瘾。离开玩具店后，两公婆十指紧扣行到商场中心停低吹水，AJ就摺起裤脚，一个人踩住自己带来的滑板车，在爹哋妈咪视线范围内辘来辘去，好鬼有型。见囝囝冇收获都冇扭计，夫妇俩也识做带对方落楼买Cupcake作安慰，仲畀佢揸主意自己拣口味，而Ice就负责畀钱，临走前，AJ依依不舍指住蛋糕柜，可能仲想Encore，不过妈咪就表示：「呢个买咗喇，同姐姐拜拜啦！」AJ先乖乖拖住妈咪离开。