【头条独家】新节目「转行」做外卖仔　43岁敖嘉年继续发演员梦

年初，43岁的敖嘉年宣布跟无綫结束22年宾主关系，回复自由身后，本来准备北上发展兼为舞台剧《周璇》演出的他，遭疫情打乱所有计划。收入大受影响的嘉年，早前于社交网贴出揸的士及Uber Eats保温袋照，令不少人都猜测他转行谋生，但原来只是为ViuTV拍摄新节目《中佬唔易做》，嘉年更强调：「暂时唔会转行，我仲未发完呢个梦！」撰文：黎宝伦　摄影：谭壹致

在节目中，敖嘉年一尝做「铁骑外卖仔」滋味，其间遇上重重困难，例如冇散银找钱、GPS失灵、落雨湿身又暴晒等，令他不禁高呼好艰辛！提到于社交网分享「揸的照」引起转行误会，嘉年即自爆有朋友主动提议为他牵线「接客」，令他大感诧异：「有个好耐冇见嘅朋友突然WhatsApp我，好含糊话『唔紧要㗎，好多嘢都面对到嘅，我得闲就介绍啲客畀你』，我谂咗阵，我做演员，介绍啲咩客畀我呢？咁我就好奇怪嘞，佢先话『我净系会同佢哋讲有架车可以接人，唔开你名，你唔需要尴尬』。（以为系饭局？）系啦，但件事好好笑又几窝心！」获不少好友和网民鼓励的他又谓暂时不会转行，皆因：「我仲未发完呢个梦！」

誓当好前辈
回想初入行被前辈寸样衰，又被路人直呼茄哩啡，当时嘉年都谂过约满便离巢，幸后来获高层曾励珍赏识，转型拍剧；历尽冷言冷语后，他亦决心以身作则善待后辈，「见到后辈唔开心我都会畀信心佢哋，其实好惨，人家雄心壮志做嗰样嘢，你咁样玩佢，令人个心郁住，你应该令佢做得更好、更落力，而唔系闹闹闹！」对于迟迟未能攀上男一，虽然嘉年坦言恨做男主角，但演员受许多因素影响，故会抱住随遇而安的心态，目前也一直搞紧自家制作。