【头条独家】一家三口去踩车 林子聪双眼冇离开过囝囝

六师弟林子聪近年主力喺内地发展，拍过好多剧同网络电影，好似《新河东狮吼》、《河妖》及《孙悟空大战盘丝洞》等，睇个名都知好睇。因为疫情影响，肥仔聪之前留咗好耐时间喺香港，咁就啱嘞，阿囝林奕滔（Chester)得4岁，日日陪仔玩，时间超易过。之前就见到佢哋一家三口去咗数码港踩单车，肥仔聪眼中只有囝囝，一路望住一路踩，踩咗两个几钟就返归。 采访:谭壹致

数码港公园可以话系星级公园，梁咏琪、吴千语、JW等都好锺意喺度玩呀放狗呀，想撞星得闲入去兜个圈啦。讲返肥仔聪，当日下昼3点半，佢同老婆、囝囝及一个男友人现身数码港，主力系肥仔聪同囝囝玩，老婆就负责睇住啲嘢。

辛苦晒爸爸
应该平时挂住搵食，亲子时间唔太多，所以肥仔聪一到埗就除低口罩黐住个仔玩，两个人沿住公园踩单车，正确嚟讲系老窦跟住囝囝踩，踩咗一阵又唞吓再继续踩，之后两个放低单车喺草地上玩推嚟推去，有几好玩?唔知，总之佢哋玩咗好耐，踩完又推完，一家三口加朋友就离开，肥仔聪逐架单车放去车尾，摆好晒就揸车返归，又要玩又要揸车，认真辛苦晒。