【咩系不妙？】父子被蟾蜍吓到弹起　杜德伟夜晚拖囝囝去「探险」

杜德伟（Alex）近日带太太李晓冰（Ice）和3岁儿子Alex Junior（AJ）入长洲露营，此趟一家三口仲选择住蒙古包，AJ甫见到张牀已经兴奋到扎扎跳！Ice昨晚再于囝囝的Instagram分享营中点滴，原来一班小朋友夜晚拎住盏灯仔去「探险」，其中一段片中，看到Alex拖住囝囝与其他小朋友一齐踎地研究蟾蜍，他耐心向大家讲解：「佢同地下啲色系一样，佢而家玩迷彩呀，佢当你哋唔知佢系青蛙（蟾蜍），以为佢系石头，佢心谂呢次不妙喇。」语毕其中一位妹猪问：「咩叫不妙呀？」Alex就回答：「即系大件事喇，畀人捉咗！」对话爆笑，结果讲完冇耐只蟾蜍忽然跳走，吓到众人弹起身！

虽然玩咗成晚AJ都嗌晒攰，但第二朝瞓醒又精力充沛再玩过，他们除了在野外用餐外，更有机会体验「游牧民族」生活，杜氏一家朝早便被好多羊咩咩包围，不过AJ似乎有啲惊，相中的他一直匿喺一个哥哥身后偷望，唔少网民睇见都大赞好得意！