【头条独家】王丽嘉挂住揿电话 王敏德父女行街惨被冷落

王敏德个名出镜率好高，因为佢两个女都好有新闻性，大女王曼喜（Kayla）嘅同性恋情经常上报，二女王丽嘉(Irisa)又好锺意放性感相到ig，激到老窦咆哮，父女隔空互动好好睇。日前下昼，王敏德同二女王丽嘉现身ifc，一样咁高嘅两父女去买乳酪食，边食边行，老窦系咁讲嘢，但阿囡对眼只系望住个电话，理吓爸爸啦。采访:谭壹致

王敏德份人都几有心，之前就试过高温下去郊野公园执垃圾，又试过喺社交网开直播唱歌，佢话为粉丝传递正能量，而佢老婆马诗慧同二女王丽嘉就担任特别嘉宾同大家倾偈，Michael话：「知好多人唔系好想出街，今次搞网上直播，希望出一分力，畀啲正能量大家。」嗯，有心嘞。

无人理王敏德
日前下午，见到戴住口罩同无戴口罩嘅王敏德父女喺ifc出现，两父女专登搭扶手电梯上两层去买乳酪，两人拣咗一阵，由Irisa找数。王敏德拉低口罩边行边食，冇罩Irisa就无呢个烦恼，一家之主好多嘢讲，系咁食系咁讲，不过阿女就唔多理佢，估住揿电话，虽然一心两用，又食又揿但Irisa完全Handle到，之后两人就搭Lift去停车场攞车离开。