【头条独家】星味盖过名模妈咪马诗慧　王丽嘉Shopping惹途人丧𥄫

马诗慧（Janet）幼女王丽嘉（Irisa）遗传哂父母的最强DNA，年仅24岁便拥一副天使面孔魔鬼身材，难怪一毕业就入行做Model。日前，两母女约埋去尖沙咀睇衫，其间散发出浓浓星味的Irisa，引来不少男士丧𥄫，反观妈咪则挂住跟同行后生女密密倾，似乎冇乜人留意到佢。采访：李维隆

马诗慧与丈夫王敏德育有两女一子，两位千金王曼喜和王丽嘉均尽得父母的优良基因，不但有超模级的高挑身形，细女Irisa更拥34D骄人上围，令身边朋友纷纷嗌羡慕，惜目标去外国行骚的她，一直想做「缩胸」手术，仲话：「试过减肥瘦咗，个胸都唔细，我都想细啲，但唔到我控制。」话虽如此，她却经常于社交网大方派「肉」照，惹来爸爸王敏德不满，但Janet则开通得多，之前仲帮爱女影岀浴照𠻹！

冷落男友人
日前傍晚5点，两母女孖咇去尖沙咀K11 Musea逛潮店，同行还有一对后生仔女。4人入商场前，好似「小学鸡」咁坐喺公园打发时间，不过他们并非围埋打机，而是各自低头揿手机，难为夹喺中间嗰位仁兄绕埋手、头岳岳，真系睇见都老尴！隔咗一阵，Irisa终于放低部电话，同男友人倾咗两句，惜好快她又重拾手机狂笃；至于妈咪Janet就忽然「睇相佬」上身，右手举起「屈指一算」，系咪算到Hea够呢？

未几，一行人便起行到潮店，心境年轻的Janet同大家都完全冇代沟，沿途跟同行后生女密密斟，反而囡囡全程做低头族，而穿Sharp黄色Jumpsuit的Irisa，虽然心口包到冚，但Fit爆身形及靓样仍吸引不少男士目光。最后，众人于潮店逛咗阵，似乎都冇睇啱嘢便走了。