【头条独家】邻居确诊新冠肺炎吓亲 薛家燕70大寿屋企闭关

本周一是薛家燕的70岁大寿，家住半山罗便臣道豪宅的寿星因为同座单位有人确诊新冠肺炎，并由救护车送往医院，因为有机会同Lift出入，吓亲的家燕姐自我隔离两日，直至正日生日下午才冒险外出走一转。而家燕姐原本安排于29日设宴与粉丝、学生及朋友庆祝生日，但疫情关系早已改期。不过，家燕咁有人缘，呢个70岁大寿依然精彩。采访：方骞平

薛家燕居于疫厦坦言心慌慌，男友知道后亦非常担心，第一时间叫她唔好外出，留喺屋企最安全：「大厦即时进行大消毒，每隔一个小时再例行消毒一次。其实我唔清楚确诊病人住喺边个单位，但好大机会用过同一部lift出入，加上欧美回港学生感染群组，同埋之前何雁诗曾一度怀疑中招，我同佢未婚夫郑俊弘啱啱拍过嘢，所以都惊埋一份。」

仔女秘制祝寿视频

家燕姐愈谂愈惊，「为人为己，我好有公德心，唔想畀人感染，亦唔想传染人，都系小心保重，最紧要健康，决定自我隔离。上周六本来要返新城电台做节目，但都改做phone in，得返主持人范振锋及思敏留守直播室。另外又同TVB《流行经典50年》监制提出停厂要求，直至4月8号复工，始终疫情肆虐，嘉宾唔戴口罩出镜都好高危。」 疫厦大消毒后，家燕姐估计病毒会几日后消失，所以喺正日生日，一身红当当返公司一阵。她说：「原先喺家燕妈妈艺术中心搞咗个生日会都被取消，不过，好多家长因为订咗蛋糕同鲜花畀我，所以我要返去收礼物。今年生日过得相当特别，虽然『闭关』留守喺屋企同囝囝石耀庭（Jackson）新抱陈素怡（Zoe）及细女石耀珠低调食生日饭，但身在美国工作嘅大女石佑珊不忘视像同我过生日，兼且送上惊喜，原来佢哋静静鸡邀请咗亲友、亲家、铁粉、圈中好友任达华、张智霖、陈展鹏及陈炜等拍视频同我贺寿，当然唔少得搵埋男朋友啦！」

体谅男友内地工作
不过家燕姐强调男友贺寿片段绝不会公开，「哈！佢呢段片我会私有化，唔公开！所有亲友每一句贺词，都令我感觉好幸福同温暖，虽然今年因为疫情冇大排筵席，亦系自96年复出以嚟第一次冇设宴，但又有另一番感觉，系一个好有爱嘅生日，相当感动，依然精彩，尤其系生日嗰日，美国返嚟嘅细女啱啱完成14日家居隔离出关，两母女第一次相见，好温馨！有呢啲仔女同媳妇，好荣幸及安慰。而演唱会老闾Simon更加赶制咗本画册畀我，做得好靓。」她又表示，因为中港两地都要隔离14日，男友在内地工作未能返港跟她祝寿，她好体谅：「咁𠵱家搭飞机都好高危，喺疫情下我哋互相关心同担心，佢都好无奈咁Message我：『希望疫情快啲过，我哋可以见面！』呢个都系我生日愿望，因为呢次系全球嘅事，人生第一次面对嘅嘢，大家都唔开心。」