【头条独家】火红Deep V先热身 34C傅嘉莉预告全裸上阵
2020-02-20 21:00 
「火辣女神」傅嘉莉 (Kelly)之前喺TVB旅游节目《识玩旅行团2》中着上纯白色三点式，于镜头前「Big波」荡漾浸温泉，大晒34C胀爆「胸器」，就连73岁「家英哥」罗家英都睇到心心眼，忍唔住喺社交网上转贴。好嘢梗系唔好畀佢停，喺全民绷紧抗疫下，身在柬埔寨拍《3日2夜》压轴篇的傅嘉莉换上一件头火红色hot爆泳衣，喺蓝天白云下继续「派糖」等大家醒吓神，Kelly仲预告在节目中会做spa，到时肯定连泳衣都唔使着祼背出镜，挑战终极性感！哗！引死人咩！采访：方骞平
由张志明监制嘅《3日2夜》同埋《识玩旅行团》系列离不开靓人、靓景，绝冇冷场。而《3日2夜》柬埔寨压轴篇由索爆傅嘉莉夥拍大只型男杨潮凯上阵。本周二（18日）外景时，Kelly率先派福利畀《头条》读者，身穿火红色喷血泳衣的Kelly置身柬埔寨一个Infinity pool大晒C cup身材，同当地天气一样，好hot！「今次会带咗两、三套战衣，会因应故事情节嚟show身材，不过，应该会比《识玩2》更加激，因为有做spa场口，连泳衣都唔使着，要背部全裸，只系揞住重要部位，我又唔介意晒身材，最重要系靓。」在旁的潮凯赞同道：「佢天生一副好身材，喺男人视角，我梗系想佢着多啲泳衣；作为好友，只要佢靓就得喇！」
full gear防疫登机
Kelly坦言对此行有期待，「之前因为大懵，原来护照有效期唔够半年飞唔到槟城，好彩监制再畀机会，就算出发前要打三枝防疫针，打完左手打右手，打到针口位好痛都抵。不过，因为新型冠状病毒疫情严重，团队都一度担心飞唔到，当时真系好惊同《3日2夜》冇缘。第一次喺咁严峻嘅环境下飞，周围气氛好紧张，反而我哋放轻松，只要做足卫生、增强抵抗力就得喇，如果我担心，妈咪就会更担心，咁状况，妈咪梗系唔想我出外拍嘢啦！都赞吓Fans好有心，佢知我要坐飞机，送咗两件粉红色雨衣畀我上机着。」潮凯提示她雨衣着完要即弃，他肉紧说：「梗系唔好再着啦，傻嘅，保护衣嚟嘛！」此刻，傻更更的Kelly才恍然大悟，最初她打算用酒精抹过再着，唔想咁唔环保。
迷人泳衣摄影师有功
提到上次喺《识玩2》中，Kelly身穿白色泳衣，迷人的曲线一览无遗成焦点所在，她就赞系摄影师功劳，「因为上次介绍好多温泉酒店，主要系摄影技巧拍得靓，其实潮凯都帮我影咗好多靓相，但我影佢就outfo，呢个都系我嘅压力呀！」
最新回应