【头条独家】唔怕除口罩 最怕冇工开 张曦雯求桃花增运势
2020-02-04 21:00 
武汉肺炎蔓延不止，TVB剧集如常开工，演员为咗妆容，就算戏外，埋位前都唔可以戴口罩。日前新剧《踩过界II》就有四名主要演员王浩信、蔡思贝、张振朗及简淑儿齐齐病倒「冧厂」，另一女主角张曦雯亦不适取消外景。监制林志华表示演员们连日开工，加上拍外景时遇大风而病倒。对于要冒险除口罩开工，新紥姐仔张曦雯(Kelly)就话唔惊，事关做女一的机会唔系时时有，「冒险都冇计，最重要系有工开，有嘢做。」趁住新正头，挟住台庆中夺得「飞跃进步女艺员」奖的旺气，日前她拉埋好友徐肇平及KOL好友朱韵韵去佛堂求桃花，望尽快乘胜追击「升呢」做视后。采访：方骞平
当日一行三人去土瓜湾一间佛堂行桃花运，顺道拜财神及太岁。三人冇戴口罩，喺佛堂内诚心上香，又合十顺时针围住桃花行咗三个圈，师傅陈定帮提示她要边行，边谂住心目中期待实现嘅画面，之后将写有心愿嘅小天灯挂上桃花树上，再闭目许愿。Kelly喺佛堂逗留期间，有女善信带埋儿子跟她集邮，Kelly亲切地抱住小朋友影相时，俏面更贴近男童，虽然举动好nice，但防疫意识未免薄弱咗啲，就连广东省卫生健康委员会都有防疫指引，提醒与别人谈话时尽量保持1米以上距离啦。
行桃花运望升呢
讲到新年愿望，张曦雯希望自己及家人身体健康，她属马，今年冲太岁，师傅叮嘱她小心驾驶，最好玩吓碰碰车嚟化解意外，幸而Kelly行运中，愈冲愈旺，能逢凶化吉。她大笑说：「我桃花反而都ok够，不过，始终做呢行要多啲观众缘，男友反而唔多理，我哋好少见到面，唔好问我点算好，我都系想专注喺工作上，庆幸大家感情都叫稳定嘅。(下个目标做视后？)会继续努力，希望桃花可以帮到手。」对于传过绯闻的陈国强辞任TVB董事局主席及非执行董事职务，她希望藉此畀大家睇到她实力及努力，见证她进步，绝对唔系因为人事：「我冇搵陈生呀，都唔知点搵佢，佢哋系大人，我只系小员工，公司行政接触唔到，而且系大人嘅事。」
否认取替李佳芯
继《木棘证人》后，《踩过界II》系Kelly第2套担正做女一嘅戏，有指视后李佳芯突然被消失，由Kelly取代，Kelly即说：「冇话边个可以取替到边个，不过，拍过嘅《跳跃生命线》、《白色强人》两套都成为『最佳剧集』，而男主角马德钟、马国明分别封视帝，我好旺男演员，另我有份演出嘅《金宵大厦》反应都好好。喺《踩II》我演一个好有心计嘅律师，为咗场官司接近盲侠王浩信，甚至会着贴身衫，用气味及声线去色诱佢，摸佢。以前做开靓靓女女角色，最初都担心做唔做得嚟，但帮帮师傅话我今年旺做癫、丧、奸嘅角色，加上啱啱攞完奬，所以做得好有压力。」
提到全城做足防疫措施自保下，唔戴口罩开工的Kelly就唔太顾忌：「要拍戏，戴唔到口罩都冇计，唔使埋位时唯有行开一边，勤啲洗手，我谂最重要系有工开同有嘢做。」咁做艺人点都系要食住个势嚟上位，睇晒呢个超级病毒都阻唔到她的决心！
最新回应