【头条独家】以前挂住凑女忽略朋友 龚慈恩有工开有Fd好满足
2020-02-13 19:04 
继剧集《牛下女高音》后，56岁龚慈恩喺TVB新剧《大酱园》中跟吴岱融再成为「夫妻」，两人早年喺《嬴单传奇》开始结缘，估唔到呢对「夫妻」做足32年，认真有默契。不过，龚姐坦言公私分明，失婚事冇同吴岱融倾诉，就算拍《大》剧期间被传媒踼爆已离婚，她只会专心拍戏，唔会将私人负面情绪带入工作中：「我OK嘅，知道应该点做，咁大个人系有啲EQ嘅，我有分寸。」采访：方骞平 服装：magazzingroup
龚慈恩喺TVB新剧《大酱园》中饰演大当家夫人席德容，虽然顺从老公，但当家道中落要挺身持家，系个坚毅女人，同《牛下女高音》大女人嘅角色好唔同：「现实版我冇大当家夫人咁有本事，通常我只系follow小朋友(子女) 嘅指令。其实同经营家人、男女朋友关系，要互相了解同迁就，开心唔开心攞出嚟讲，一齐面对。」
快乐最重要
龚姐又形容拍《大酱园》好辛苦，但返嚟TVB感觉好开心。问到系咪寄情工作？她坚持有工作永远系开心嘅：「以前有段时间主力凑小朋友，忽略咗朋友，𠵱家工作时搵到旧朋友，又识到好多新朋友，咁咪开心罗。啱啱拍《香港爱情故事》入面有句对白好犀利：『咁你就要更加努力令到自己有更多开心嘅时间！』对自己好有提示，人当然有开心唔开心嘅事，不过，喺适当环境下要有适当安排罗，其实呢个年代有冇拍拖，有冇另一半都冇乜所谓，最紧要生活过得自在开心，有自己工作，仲可以选择同志同道合嘅朋友一齐，有爱锡嘅子女，做人简单快乐经已好满足。」
最新回应