【头条独家】《大酱园》首做男一无压力何广沛攞正牌同朱晨丽谈情

2020-01-17 18:55

何广沛(Matthew)演出的《黄金有罪》及首做男一嘅《大酱园》叠住出街，后者更和绯闻女友朱晨丽(朱朱)由欢喜冤家演到变夫妻，奉旨谈情；而《黄金有罪》则愈拍愈灰，他带笑投诉：「以往喺剧入面系爱情长胜将军，女角会主动媾我，今次争女神陈滢输咗畀洪永城，仲冇埋事业要自杀，真系好黑暗，唯一希望一死会感动到观众，好似张彦博喺《跳跃生命线》嘅「雄姐」咁爆红啦。」采访：方骞平服装：MYND

何广沛形容自己喺《黄》剧中只系一名小配角，不过算系几有发挥：「剧入面我系演正直警察，后期同恩师张兆辉关系决裂，争陈滢又唔够洪永城争，事业爱情都双失。以前拍剧都被安排有条好靓嘅感情线，演嘅又系平步青云角色，从未试过咁兜踎，好彩最后监制王心慰都可怜我，唔使我输晒咁惨，畀返个靓女丁乐锶我，同陈滢比较，两人各有各靓啦，陈滢好男仔头，不过佢嘅靓系公认㗎啦，所以我唔会再赞佢，有陈家乐赞就得嘞，(留返嚟赞朱朱？)哈！朱朱都好多人赞！」

最锺意闹朱朱
虽然同时间有两剧出街，但何广沛仍然对收视好有信心：「据过往剧集纪录，我都系收视福将，好有剧运，演过嘅《亲亲我好妈》、《超时空男臣》、《跳跃生命线》同《白色强人》收视都系头3位，而且《大酱园》系民初大剧，有好多资深演员分担，相对冇咁大风险，首做男一唔会有好大压力。最开心可以攞正牌同朱朱闹交，我锺意闹佢咪闹佢罗，唔使负责任，几爽呀！」