【头条独家】行外父政策　陪张父拣车　袁伟豪张宝儿买猫同居试婚

现年38岁的袁伟豪（Ben）与张宝儿（Bowie）拍拖两年多，爱得甜蜜的两人不时传婚讯，可惜一直只闻楼梯响。去年5月，Ben认同女友倾过结婚，当时仲话若搞婚礼都要1年后，亦不讳言袁妈妈都恨「饮新抱茶」；后来他更传获高人指点，再加上受去年11月做老衬的陈山聪感染，终于决定今年迎娶Bowie！踏入鼠年第一步，一对准新人便率先同居试婚，上周两人拍住拖到铜锣湾拣家品，又物色「心头猫」，莫非想共同抚养猫仔先，当作做爹哋妈咪的入门训练？最后，这位「未来好女婿」仲陪张爸爸睇车，实行行外父政策！采访：梁志明

袁伟豪与张宝儿于2017年因合拍旅游节目《打工捱世界Ⅱ》而挞着，二人拍拖两年多以来频频传出婚讯，至去年9月再被爆决定今年拉埋天窗！上周三（29日）晚上约7点，两人到百德新街的家品专门店Francfranc添置家居用品，见两人对一张折后只售686蚊的大地毡相当感兴趣，Ben仲又揭又摸，女友就喺侧边畀意见，不过唔知女人仔系咪要格吓价先呢？Bowie拎住手机影一影个花款同价钱，然后两个再商讨一轮，最终搞咗20分钟都系冇买到。接着，Ben覆咗个Message后，两人便走到附近的宠物店，甫进店内，他们即隔住玻璃撩猫咪玩，冇耐Ben就手指指问职员价钱，结果谨慎购物的他望多一阵，卒之都去咗另一间店再物色「心头猫」。

引入新猫
今次见Bowie对住个笼上下左右系咁𥄫，好似有心水，男友仔都好识做，即刻叫职员：「开笼，Please！」对方帮二人双手喷过消毒酒精后，立马拎只体形特大嘅缅因猫给Ben抱，而Bowie就系咁捽猫咪块面，爱不释手 ，之后仲「挨」男友畀佢抱吓，不过做开「狗奴才」的她似乎唔多识抱猫，搞到只「巨猫」啲手手脚脚一路沉落去，好似好辛苦咁，场面搞笑！然而，Ben于去年11月才养了一只缅因猫Marky，短短两个多月再添新成员，睇嚟是因为家中多个女主人，担心「主子」呷醋，所以物色多个伴畀Marky，顺道让Bowie练习一下照顾小生命，为未来做妈咪作准备！不过最后两人都无拎猫返归。

融入张家
离开宠物店后，两人便会合Bowie的父母和细佬，到信和广场的Jaguar & Land Rover车行，见三个男人围住一部价值80多万的SUV型号Evoque研究，Ben仲一直傍实「未来外父」又Check车笼又畀意见，「未来舅仔」都喺隔离密密斟，关系非常Close，看来他已经融晒入张家之中，走的时候张爸爸都笑晒口，应该都好满意Ben的协助，最后一行五人又行番去宠物店睇猫，估唔到拣猫都要问准老人家意见，果然系一个「好女婿」！