【头条独家】自资四十万出处男碟圆梦张崇基预咗蚀痛得起

2020-02-04 22:00

入行27年，刚「入五」的张崇基跟胞弟崇德以「二重唱」组合形式先后开过10次演唱会及出过5张《Duet》专辑，但原来张崇基从未出过一张Solo碟。最近佢自资40万推出处男专辑《我的八十年代广东歌》，挑选咗喺80年代，影响他最深嘅10首歌曲重新演绎，由于限量发售1000张，加埋受经济环境影响，唱片市道雪上加霜，张崇基预咗蚀住做，好彩有能力痛得起，可以任性去圆梦！采访：方骞平发型：Kenji@IL Colpo 场地：Vibe Cafe & Bar

张崇基的HiFi碟《我的八十年代广东歌》翻唱咗林子祥《几段情歌》、谭咏麟《爱的逃兵》、林珊珊《把歌谈心》等，全部系当年耳熟能详嘅经典好歌：「其实最初构思出够3 CD，分别同张崇德一人一张Solo碟，再加二重唱碟，咁样就可以突显我哋两兄弟嘅音乐特质，奈何巿道问题，咁做太重皮而放弃。但又好任性咁想有张个人唱片，就算喺逆市，都坚持要送呢份礼物畀自己。」

名贵大礼赠自己
呢份名贵大礼超过40万，除咗包装到好似本厚书仔外，唱片采用DSM音效技术，喺美国制造，歌曲又加入罕有乐器，好似手风琴，要专程由欧洲音乐家录返嚟，「我问大师要有乜准备嚟配合？佢竟然回答我：『只要准备欧罗，汇钱过去就可以喇！』可幸入行咁多年仲有筹码，我预咗肉赤，仲痛得起，唔会入晒肉。」另外，喺制作唱片期间发生过小风波：「我做好晒张HiFi碟，先发现《情已逝》同《奔向未来日子》喺歌曲版权上有小小棘手，呢啲系音乐人冇可能犯嘅错，好彩最后都顺利解决到。其实最初原意只系跟志同道合嘅朋友玩吓，冇谂过会成为商品发售，情有可原啦。」