教小朋做戏激发导演梦 余香凝预告情人节做电灯胆黐饭食

余香凝（Jennifer）最近推出新歌《无得比》，希望藉歌曲鼓励听众欣赏自己，不要活在被比较的阴影之中。是次Jennifer除了有份构思MV内容，更被激发出潜在的导演魂，不时指导小演员做戏，过足导演瘾；她亦发下豪语，寄望下次亲自执导个人MV，朝导演之路进发！
再度包办新歌作曲部分，Jennifer说歌曲取材自真实经验：「《无得比》主要系讲『比较』嘅心理，记得小学时，有个同学弹琴好叻、读书又好，妈咪经常同我讲『你学吓人啦，点解你咁差㗎？』当时成日觉得自己好无用。最近妈咪撞返呢位旧同学，原来过咗咁多年，我仍然耿耿于怀，暗地里想同对方比较，睇吓边个成功啲，我先发现呢个心态好恐怖，所以要用呢首歌提醒自己，唔好成日同人比较，要相信每一个人都系独特嘅，希望透过呢首歌，鼓励大家多啲欣赏同爱惜自己，相信自己系最完美。」

日前Jennifer拍摄新歌MV，对演戏驾轻就熟的她，首次放下演员身份，专心夹band唱歌，「第一次冇参与演戏嘅部分，放手交畀其他演员去做，同公司嘅方珈悠（Jamie）都有参与拍摄，好多谢大家仗义帮忙！不过因为紧张个效果，所以一早就嚟睇佢哋拍摄，当中有个小朋友可能太攰，中途扭计跑走咗，我突然有啲『导演上身』嘅感觉，一路喺镜头外教佢点做，呢个经验几特别，以后有机会都想执导自己MV，不过自知镜头处理方面唔系咁叻，所以希望可以合导。」
问到「余导」届时会否趁机自肥，安排型男对戏？Jennifer竟自爆最想上演「动作戏」：「如果真系有个男主角，我唔想做啲好sweet嘅嘢，反而希望可以同佢嗌交，甚至拍打架嘅戏，咁样拍出嚟我反而兴奋啲。」
情人节将至，单身的Jennifer自言一点也不寂寞：「我啲朋友好好，会叫我一齐过节，所以我大时大节，都会黐住情侣同夫妇食饭，哈哈！好似啱啱嘅平安夜同圣诞节，我就连续两日去做电灯胆，名符其实系圣诞灯饰。」