【头条独家】拍心口保证鼠年「冇意外」 JW关楚耀未打算组织家庭

2020-02-03 20:58

过去一年王灏儿（JW）同关楚耀（Kelvin）成绩都唔错，除咗各自出咗两首歌曲外，仲一齐走埠，去咗英国开演唱会，踏入新的一年，两人孖住同门董嘉仪(LuLu)及王晓君(Elaine)一齐食开年饭开心欢聚。席间被问到成日同富贵男友Tarzan放闪嘅JW会否做鼠年新娘？她就坚决话冇plan，又话深信鼠年唔会出意外(怀孕)！语毕就交波追问关楚耀，搞到Kelvin都尴尴尬尬话：「我都会好安全。」好搞笑。采访：方骞平摄影：张咏森场地：山林道松山海鲜锅

今年王灏儿、关楚耀、董嘉仪及王晓君拣咗食中菜，包括有鸿运豉油鸡、发财好市、嘻虾大笑、年年有鱼、同生财生菜贺年，JW仲考急智大讲意头话：「食过黄金虾，做嘢唔会畀人虾；食过豉油鸡，周身冇闭翳！」Kelvin大笑回话：「食过豉油鸡，大家唔会曳！」Elaine接住说：「食咗虾酱生菜就人见人爱！」LuLu唔执输说：「发财蚝鼓做嘢唔会屎！」

未打算鼠年结婚
去年JW推出的歌曲《年末感恩》及《逃生门》反应好好，今年会乘势追击，所以唔打算做少奶奶：「我哋系开心嘅，希望新一年Keep住开心，多谢大家关心，但同男友喺工作上各自有大计，暂时唔会喺鼠年结婚。我系传统嘅女仔，一定唔会有意外，呢方面我交波畀阿关，问吓佢会唔会突然有咗BB呢？」Kelvin即一面尴尬回应：「我都好安全！虽然见身边人好幸福，都好想有自己嘅家庭，而且都认定咗女友Joann，但仲未有呢个plan，反而妹妹关美薇(Natalie)今年9月会爬头出嫁。」提起空姐女友，关楚耀自爆女友对他外表好有要求：「佢成日取笑我肥咗同胀咗好可爱喎，其实我好唔开心，因为我系走有型路线，𠵱家唯有努力keep fit。」