【头条独家】望攞「飞跃」奖实践梦想 邓佩仪贴锺嘉欣相鼓励自己
2020-01-09 23:00 
入行6年，27岁嘅邓佩仪（Gloria）够乖，形象又讨好，被TVB力捧成为上位小花。今年台庆颁奖礼更凭《金宵大厦》、《铁探》获女配及「飞跃进步女艺员」奖提名，Gloria形容女配强敌当前，陈滢、冯盈盈及龚嘉欣等个个样靓身材正，自问系陪跑；就连「飞跃」对手张曦雯及汤洛雯等都好强。不过她直言，拎「飞跃」奖系佢呢刻嘅梦想。采访：方骞平 摄影：李维隆 场地：北京老家@尖沙咀加拿分道
去年邓佩仪跟张曦雯、汤洛雯及麦明诗齐角逐「飞跃进步女艺员」，最后输咗畀冯盈盈，今年Gloria再接再励争逐该奖项，但就冇乜信心：「入到5强都当赢，尤其张曦雯咁劲，既有靓样，又有演技，仲有埋身材，冇得输！」Gloria又自爆：「芸芸飞跃女艺人中，最有印象系锺嘉欣06年攞飞跃奖，佢手持飞跃奖项呢张相一直贴喺我客厅嘅愿望挂板上，代表住拎飞跃奖喺目前想实践嘅其中一个小愿望。」
感激锺嘉欣
问到其他心愿，佢话希望今年可以去到巴黎。「虽然我仲未攞到飞跃奖，但叫做有些少关连，算系同锺嘉欣之间嘅距离又行近咗一步，咁都好开心㗎嘞。Linda有事业、有家庭系我人生努力目标，佢嘅工作及待人态度令人欣赏。当年佢知道我同样系温哥华返港选美，佢特别照顾我，更招呼我去佢屋企食饭，煮咗好味嘅梅菜蒸肉饼、蒸鱼同炒菜等，当年我拍处女剧《点金胜手》，嘉欣都有畀意见。」至于角逐女配，Gloria自言更有难度，论资排辈真系要磨练多几年，待完全掌握到演技先有机会：「我睇好陈滢嘅《福尔摩师奶》，因为佢个角色有多重人格，亦正亦邪系我最想尝试嘅角色。」
最新回应